ახალი ამბები

თურქი მომღერალი რელიგიურ სკოლებზე ნათქვამი ფრაზის გამო დააკავეს

26 აგვისტო, 2022 • 3567
თურქი მომღერალი რელიგიურ სკოლებზე ნათქვამი ფრაზის გამო დააკავეს

თურქეთში დააკავეს ცნობილი მომღერალი, რომელსაც “სიძულვილის გაღვივებას” ედავებიან კონცერტის დროს რელიგიური სკოლების მისამართით ნათქვამი ფრაზის გამო. გიულშენის დაკავებას წინ უძღოდა სამთავრობო მედიასა და სოც. მედიაში აგორებული კამპანია მის წინააღმდეგ.

როგორც თურქული გამოცემა Bianet წერს, სტამბოლის მთავარმა პროკურატურამ გამოძიება 24 აგვისტოს, მას შემდეგ დაიწყო, რაც სოციალურ ქსელში გავრცელდა გიულშენის კონცერტზე გადაღებული ვიდეო. ვიდეოს მიხედვით, მომღერალი ამბობს: “ის იმამ-ჰათიფის სკოლაში სწავლობდა. გარყვნილებაც იქიდან გამოჰყვა”.

მომღერლის ნათქვამს აუდიტორიიდან სიცილი მოჰყვა. უცნობია, კონკრეტულად ვის გულისხმობდა გიულშენი.

“იმამ-ჰათიფის” სკოლები წარმოადგენს რელიგიური სკოლების ქსელს, რომელიც პრეზიდენტ რეჯეფ თაიფ ერდოღანის მმართველობის პერიოდში განსაკუთრებით გაფართოვდა.

მედიის ცნობით, გიულშენი სტამბოლში, ჩვენების მიცემის შემდეგ დააკავეს. მას ედავებიან “ხალხში სიძულვილისა და მტრობის გაღვივებას”.

მომღერალი “ტვიტერზე” 25 აგვისტოს გავრცელებულ განცხადებაში აღნიშნავს, რომ ვიდეო აპრილში გამართული კონცერტიდანაა. მისი თქმით, იხუმრა და ბოდიშს უხდის ყველას, ვინც გაანაწყენა ხსენებულმა ფრაზამ. გიულშენი ასევე დასძენს, რომ მისი სიტყვები ზოგიერთმა გამოიყენა საზოგადოების პოლარიზების მიზნით.

ვიდეოს გავრცელების შემდე,გ მომღერლის წინააღმდეგ გამოძიებამდე, იგი მიზანში ამოიღეს სამთავრობო მედიამ და სოც. მედიის მომხმარებლებმა. შეიქმნა ჰეშთეგებიც “ტვიტერზე”, სიტყვებით “დააპატიმრეთ გიულშენი” და “გიულშენ, იცოდე შენი ადგილი”.

Bianet-ის მიხედვით, კონსერვატორები აქამდეც არაერთგზის აკრიტიკებდნენ მომღერალს სცენაზე მისი ჩაცმულობისა და ლგბტ ადამიანებისადმი მხარდაჭერის გამო.

რელიგიურ სასწავლებლებზე გიულშენის განცხადება დაგმეს როგორც თურქეთის მმართველ პარტიაში, ისე მთავრობაში. მმართველ “სამართლიანობისა და განვითარების პარტიაში” ამბობენ, რომ “საზოგადოების ნაწილის მიზანში ამოღება” და “თურქეთის დაყოფის მცდელობა სიძულვილის დანაშაულია”.

თავის მხრივ, მომღერლის დაკავების ფაქტი არაერთმა ოპოზიციონერმა პოლიტიკოსმა გააკრიტიკა, “ტვიტერზე” კი გავრცელდა გიულშენის მხარდამჭერი ჰაშთაგიც, სიტყვებით “გიულშენი მარტო არ არის”.

“სახალხო რესპუბლიკური პარტიის” — თურქეთის უმსხვილსი ოპოზიციური ძალა — ასამბლეის წევრი სვამს კითხვას, იწყება თუ არა გამოძიება მათ წინააღმდეგაც, ვინც ამბობს, რომ რელიგიური რიტუალების შეუსრულებლობის გამო ადამიანების სიცოცხლის ხელყოფა ან ცემა შეიძლება.

“ვისაც ჰგონია, რომ რეაქციული ფატვებით, აკრძალვებით, სასამართლოთი და ლინჩის კულტურით შეუძლიათ ჩვენი ქვეყნის ხელში ჩაგდება, კარგად უნდა იცოდეს:

ჩვენ დავიცავთ თავისუფალ ხელოვნებას! ჩვენ არ დავთმობთ სეკულარიზმს!” — ნათქვამია კიდევ ერთი ოპოზიციური პარტიის, “თურქეთის მშრომელთა პარტიის” განცხადებაში.

გარეკანის ფოტო: İHA

მასალების გადაბეჭდვის წესი