ახალი ამბები

საბერძნეთში თანაინვესტირების ფონდის ყოფილი ხელმძღვანელის ვილა გაძარცვეს

12 ივლისი, 2022 • 951
საბერძნეთში თანაინვესტირების ფონდის ყოფილი ხელმძღვანელის ვილა გაძარცვეს

საბერძნეთის კუნძულ მიკონოსზე საქართველოს თანაინვესტირების ფონდის ყოფილი ხელმძღვანელის, გიორგი ბაჩიაშვილის ვილა გაძარცვეს. ბერძნული მედიის ინფორმაციით, შემთხვევა გასულ კვირას მოხდა. ძარცვის ფაქტს თავად ბაჩიაშვილიც ადასტურებს.

გაზეთ Phtothema-ს თანახმად, ქართველმა ბიზნესმენმა პოლიციას აცნობა, რომ სხვა ადამიანებთან ერთად კუნძულზე სასეირნოდ იყო გასული, რა დროსაც მძარცველები სახლში ფანჯრიდან შევიდნენ და ერთ-ერთი საძინებლიდან 90 000 ევროს ღირებულების ძვირფასეულობა მოიპარეს.

“protothema.gr-თან საუბრისას მან დაადასტურა ინციდენტი და განაცხადა, რომ პოლიციელებს აღებული აქვთ  ფოტოები, ასევე თითის ანაბეჭდები, და იმედი აქვთ, რომ მოპარულ ნივთებს იპოვიან. ბიზნესმენის თქმით, მოპარული ძვირფასეულობა დაზღვეული არ ყოფილა”, — წერს გამოცემა.

მომხდარის შესახებ გიორგი ბაჩიაშვილმა სოციალური ქსელის აუდიტორიასაც უამბო.

“მიკონოსი ჩემი ერთ-ერთი საყვარელი ადგილია, რომელსაც ხშირად ვსტუმრობ ჩემს ოჯახთან და მეგობრებთან ერთად ყოველ ზაფხულს.

სამწუხაროდ, მისი უსაფრთხოება ბოლო წლებში გაუარესდა. 3 დღის წინ რამდენიმე, მათ შორის ჩვენი, ვილა გაძარცვეს… მძარცველებმა პირადი ნივთები და ძვირფასეულობა წაიღეს.

საბედნიეროდ, ყველა უსაფრთხოდაა, შემოჭრილები არავის დაუნახავს”, — წერს ის “ინსტაგრამზე”.

ბაჩიაშვილი მოუწოდებს ადგილობრივ პოლიციას, სათანადოდ გამოიძიოს დანაშაული.

გიორგი ბაჩიაშვილი 6 წლის მანძილზე იკავებდა ფონდის აღმასრულებელი დირექტორის თანამდებობას. ფონდის დაფუძნების პროცესში ექსპრემიერი ბიძინა ივანიშვილი იყო ჩართული.

მასალების გადაბეჭდვის წესი