ახალი ამბები

“ყველამ უნდა დავგმოთ ეს ფაქტი” – წილოსანი სამნიძესა და ბერძენიშვილზე თავდასხმაზე

6 ივნისი, 2022 • 789
“ყველამ უნდა დავგმოთ ეს ფაქტი” – წილოსანი სამნიძესა და ბერძენიშვილზე თავდასხმაზე

„ქართული ოცნების“ წევრი ნინო წილოსანი აცხადებს, რომ „რესპუბლიკური პარტიის“ ლიდერებზე თავდასხმა ყველამ უნდა დაგმოს.

„რესპუბლიკური პარტიის“ ლიდერებს, ხათუნა სამნიძესა და დავით ბერძენიშვილს თავს დაესხნენ. ამის შეახებ ნეტგაზეთს დეპუტატმა ხათუნა სამნიძემ განუცხადა. შემთხვევა დღეს, 6 ივნისს, რუსთაველის გამზირზე, მოხდა.

წილოსანის თქმით, აუცილებელია, რომ მოძალადეები სათანადო სიმკაცრით დაისაჯონ.

„ჩემს კოლეგა ხათუნა სამნიძეს ახლახან თავს დაესხნენ, მიაყენეს სიტყვიერი და ფიზიკური შეურაცხყოფა. როგორც ვიცი, ეს პირი/პირები უკვე დააკავეს. თუმცა აუცილებელია, მათ ქმედებას და ამ შემაშფოთებელ ფაქტს მოჰყვეს ადეკვატური რეაგირება, რათა სათანადო სიმკაცრით დაისაჯონ მოძალადეები

ასევე , ვფიქრობ, ყველამ უნდა დავგმოთ ეს ფაქტი , რომ აღარავის მოუვიდეს თავში თავისი პოლიტიკური პოზიციების ძალადობრივი ქმედებით დაფიქსირება”, – განაცხადა წილოსანმა.

ის ასევე, სავარაუდოდ, გამოეხმაურა გუშინ ტვ პირველის ეთერში მომხდარ ინციდენტს ლეიბორისტ გიორგი გუგავასა და დეპუტატ პაატა მანჯგალაძეს შორის.

“აქვე მივმართავ ჩემს კოლეგებს – თავად ნუ მივცემთ საზოგადოებას მაგალითს, რომ ხელით შეიძლება ერთმანეთს შევეხოთ. რაც არ უნდა იყოს, საზოგადოების სახეს წარმოვადგენთ“, – წერს წილოსანი სოციალურ ქსელში.

როგორც ხათუნა სამნიძე ნეტგაზეთთან ამბობს, ის და დავით ბერძენიშვილი ქაშუეთის ტაძართან მიდიოდნენ, რა დროსაც ორი კაცი თავს დაესხა პოლიტიკური ნიშნით და მათ ფიზიკური და სიტყვიერი შეურაცხყოფა მიაყენა. მისი თქმით, მას და ბერძენიშვილს თავდამსხმელებმა ხელი ჰკრეს, თუმცა ფიზიკური დაზიანებები არ მიუღიათ.

„გამოგვყვნენ, მე შუაში ჩავდექი, მეც მაგინეს და მუქარა იყო, რომ „ქალაქში თქვენ მარტო ვერ გაივლით, დაცვის გარეშე… ნახეთ, რას გიზამთ და ასე შემდეგ… თქვენ ხართ ამ ქვეყნის მოღალატეები და ა.შ. ხელის შეხებაც იყო და ხელის კვრაც, ჩხუბიც მოხდა. მე ვიგრძენი სერიოზული საფრთხე, რომ რაღაც მოხდებოდა და ფიზიკურადა დაგვაზიანებდნენ, ისეთი ძალადობა იყო“, – განაცხადა ხათუნა სამნიძემ.

როგორც დავით ბერძენიშვილმა „ფორმულასთან“ განაცხადა, თავდამსხმებელმა მას უთხრეს, რომ ის და მისი ძმა „ერეკლე მეფეს აგინებდნენ“.

“მე დავაპირე მშვიდი საუბარი, მათი ინტერესი არ იყო მშვიდი საუბარი. მერე გვითხრეს, ჩვენ წმინდანს აგინებს შენი ძმა, თქვენც აჰყევით. მე ვუთხარი, ერეკლე წმინდანი არ იყო, მერე გადავიდა გინებაზე, აქ ვერ გაივლითო, სიტყვიერი შეურაცხყოფა პირდაპირ მიაყენა ხათუნას“, – განაცხადა დავით ბერძენიშვილმა.


ბოლო კვირებია, „რესპუბლიკური პარტიის“ დამფუძნებლის, პუბლიცისტ ლევან ბერძენიშვილის განცხადება ერეკლე მეორესთან დაკავშირებით განხილვის თემაა.

პუბლიცისტმა ლევან ბერძენიშვილმა, – „რესპუბლიკური პარტიის“ დამფუძნებელმა, – ერთ-ერთ იუტუბ-არხთან ინტერვიუში თქვა:

„ამდენ ტყუილში დავიღალეთ, რა. სანამ ერეკლე მეფე მოღალატედ არაა გამოცხადებული, მანამდე ირაკლი ღაბირაშვილი გამოვა, იტყვის, „ომი გინდათ“? ერეკლემაც მაგი თქვა, რა, აბა, ომი გინდათო? მეომარი კაცი იყო, 80 ომი მოიგო. ჰოდა, მე მეკითხდებოდა, ომი გინდაო? მე არ მინდოდა ომი, არავის არ გვინდოდა, მაგრამ რომ ჩააბარა მთელი საქართველო, როცა კახეთს აკონტროლებდა მხოლოდ, ვინ მისცა მაგის უფლება“?

ბერძენიშვილის ამ შეფასებას ისტორიკოსების ნაწილი არ დაეთანხმა. მაგალითად, ილიას უნივერსიტეტის ასოცირებულმა პროფესორმა, ბექა კობახიძემ ფეისბუკზე დაწერა: „თეზა, რომ ერეკლე მეორე არის „მოღალატე“, იმიტომ, რომ რუსეთს დაგვაკავშირა, ნიშნავს მეოცე და ოცდამეერთე საუკუნეში ერეკლეს გადმოყვანას და ამ დებულებას არაფერი აქვს საერთო მეცნიერებასთან“.

თუმცა პროცესები პროფესიულ კრიტიკას გასცდა. „მითების დეტექტორის“ ცნობით, ფეისბუკზე გავრცელდა ბერძენიშვილის ნათქვამი სხვა ფრაზებიც, – კონტექსტიდან ამოგლეჯილად, შეურაცხმყოფელი კომენტარებით.

მოგვიანებით manifest.ge-ზე გავრცელდა პეტიცია, რომლითაც ხელმომწერები ითხოვენ, რომ ბერძენიშვილს „სტუდენტებთან კომუნიკაცია აეკრძალოს საგანმანათლებლო კუთხით“.

რამდენიმე დღის წინ, 28 მაისს, თელავში, ერეკლე II-ის სახლ-მუზეუმთან აქცია გაიმართა „ერეკლე II-ის დასაცავად“. აქციაზე ასევე მოითხოვეს ერეკლე II-ის წმინდანად შერაცხვა.

ხათუნა სამნიძე: მე და დავით ბერძენიშვილს ქუჩაში თავს დაგვესხნენ

მასალების გადაბეჭდვის წესი