გერმანიის საზღვაო ძალების სარდალმა, კაი-ახიმ შენბახმა თანამდებობიდან გათავისუფლება ითხოვა — წერს გერმანული გამოცემა SPIEGEL. აღნიშნულს წინ უძღოდა შენბახის კომენტარები ყირიმზე, ვლადიმერ პუტინსა და ნატოში უკრაინა-საქართველოს მიღების საკითხზე.

22 იანვარს გავრცელებულ ვიდეოში, რომელიც ინდოეთში, ერთ-ერთ კვლევით ცენტრში გამართული დისკუსიისას არის გადაღებული, საზღვაო ძალების სარდალი დასძენს, რომ ვლადიმერ პუტინი პატივისცემას იმსახურებს, ყირიმს უკრაინა ვერასდროს დაიბრუნებს, ალიანსში საქართველოს მიღება კი ჭკვიანური არ არის.

SPIEGEL-ის ცნობით, გერმანიის თავდაცვის მინისტრმა კრისტინა ლამბრეხტმა შეიარაღებული ძალების გენერალ-ინსპექტორთან და თავის PR მრჩეველთან ერთად იმსჯელა, რა სახის რეაგირებას საჭიროებდა შენბახის კომენტარები.

ჯგუფი შეთანხმდა, რომ საზღვაო ძალების სარდალს სასწრაფოდ, საჯაროდ უნდა განემარტა თავისი განცხადებები, ორშაბათისთვის კი ის გენერალ-ინსპექტორთან შეხვედრაზე დაიბარეს ამავე საკითხზე სასაუბროდ.

გამოცემის თანახმად, ამ ფონზე, სამხედრო დეპარტამენტში ბევრი ელოდა, რომ შენბახი თავისით მოითხოვდა თანამდებობიდან გათავისუფლებას.

“წინააღმდეგ შემთხვევაში, მინისტრს მისი გადაყენება არაუგვიანეს კვირის დასაწყისისთვის მოუწევდა, რადგან ის ვერ შეეგუებოდა წამყვანი გენერლის მსგავს ჩავარდნას”, — წერს SPIEGEL.

საბოლოოდ, ავტორის სიტყვებით, შენბახმა “აირიდა უხერხულობა და თავად ითხოვა თანამდებობიდან გათავისუფლება”.

ამ დრომდე, აღნიშნული ინფორმაცია გერმანიის მთავრობას ოფიციალურად არ დაუდასტურებია.

მანამდე, გერმანიის თავდაცვის სამინისტროს სპიკერმა თქვა, რომ შენბახის გზავნილები არ წარმოადგენს ბერლინის პოზიციას, თავად სარდალმა კი შეცდომა უწოდა თავის საქციელს.

არ ასახავს გერმანიის პოზიციას — ბერლინი თავისი საზღვაო ძალების სარდლის კომენტარზე