უკრაინის პრეზიდენტი ვოლოდიმირ ზელენსკი ჯო ბაიდენის განცხადებას ეხმაურება და აცხადებს, რომ არ არსებობს „მცირე შეჭრა“ და „პატარა ერები“.
„ჩვენ გვინდა გავახსენოთ დიდ ძალებს, რომ არ არსებობს მცირე შეჭრა და პატარა ერები. ისევე, როგორც არ არსებობს მცირე მსხვერპლი და მცირე მწუხარება საყვარელი ადამიანების დაკარგვის გამო. ამას ვამბობ, როგორც დიდი ძალის პრეზიდენტი“, – წერს ზელენსკი ტვიტერზე.
We want to remind the great powers that there are no minor incursions and small nations. Just as there are no minor casualties and little grief from the loss of loved ones. I say this as the President of a great power 🇺🇦
— Володимир Зеленський (@ZelenskyyUa) January 20, 2022
აშშ-ის პრეზიდენტმა ჯო ბაიდენმა რუსეთის მიერ უკრაინაში შეჭრასა და აშშ-ის, ნატოსა და მოკავშირეების პასუხზე საუბრისას განაცხადა:
„ეს დამოკიდებულია იმაზე, თუ რას იზამს რუსეთი – ერთია, თუ ეს იქნება მცირე შეჭრა და ჩვენ დავიწყეთ იმის შესახებ კამათი, რა გავაკეთოთ და რა არ გავაკეთოთ. მაგრამ თუ ისინი მართლაც გააკეთებენ იმას, რაც შეუძლიათ იმ ძალით, რომელიც საზღვართან არის მობილიზებული, თუ კიდევ შეიჭრებიან უკრაინაში, სრული კატასტროფა იქნება რუსეთისათვის. ჩვენი პარტნიორები და მოკავშირეები მზად არიან, მაღალი ფასი გადაახდევინონ და მნიშვნელოვანი ზიანი მიაყენონ რუსეთსა და რუსეთის ეკონომიკას“, – თქვა ბაიდენმა.
მოგვიანებით თეთრმა სახლმა ბაიდენის განცხადება განმარტა. მათი თქმით, პრეზიდენტმა ჯო ბაიდენმა მკაფიოდ განუცხადა ვლადიმერ პუტინს: „თუკი რუსული სამხედრო ძალა რაიმე სახით გასცდება უკრაინის საზღვარს, ეს არის განახლებული შეჭრა, რასაც მოჰყვება სწრაფი, მკაცრი და ერთიანი პასუხი შეერთებული შტატებისა და ჩვენი მოკავშირეებისგან“.
მოგვიანებით გავრცელებულ განმარტებაში თეთრი სახლის პრესპიკერმა ასევე განაცხადა:
„პრეზიდენტმა ბაიდენმა დიდი ხნის გამოცდილებიდან ასევე იცის, რომ რუსეთს აქვს აგრესიის ვრცელი კრებული, რომელიც სამხედრო ქმედებას არ მოიცავს, თუმცა მოიცავს კიბერთავდასხმებსა და პარამილიტარულ ტაქტიკას. და პრეზიდენტმა დღეს დაადასტურა, რომ რუსეთის აგრესიის ამ აქტებს მოჰყვება გადამწყვეტი ერთიანი საპასუხო ნაბიჯი“.
შეერთებულმა შტატებმა განაცხადა, რომ მზად არის განიხილოს გარკვეული ზომები, როგორიცაა შეიარაღების კონტროლი და სამხედრო წვრთნების მასშტაბები, მაგრამ ეს უნდა იყოს ორმხრივი. ამასთან, ვაშინგტონმა გამორიცხა აღმოსავლეთ ევროპაში ნატო-ს სამხედრო ყოფნის შესუსტება და რუსეთისთვის გარანტიის მიცემა, რომ ნატო არ გაფართოვდება.
დიპლომატიური მოლაპარაკაბები როგორც აშშ-თან ორმხივ, ისე ნატო-ს ფორმატში გრძელდება და მოსკოვი დასავლეთისგან წერილობით საპასუხო წინადადებებს ელის.
ამავდროულად, კიევმა დასავლეთის ქვეყნებს სთხოვა, მიაწოდონ იარაღი, რათა თავდაცვა მოახერხონ.
რუსეთის მიერ უკრაინაზე შესაძლო თავდასხმის რისკის ფონზე, გაერთიანებულმა სამეფომ და აშშ-მა უკრაინის თავდაცვითი იარაღით მომარაგება დაიწყეს.