ჯანდაცვის მინისტრის მოადგილის, თამარ გაბუნიას განცხადებით, 17 იანვრიდან კორონავირუსით ინფიცირებულებისა და მათი კონტაქტებისთვის იზოლაციის ვადები მცირდება. ამის შესახებ გაბუნიამ დღეს, 14 იანვარს, ჯანდაცვის სამინისტროში გამართულ ბრიფინგზე განაცხადა.
კერძოდ, გაბუნიას თქმით:
- ასიმპტომური მსუბუქი შემთხვევებისთვის განისაზღვრა იზოლაციის 8 დღე. ამასთან, სიმპტომების ალაგებიდან უნდა იყოს გასული, სულ მცირე, 24 საათი. იზოლაციის დასრულებიდან მომდევნო 5 დღის განმავლობაში კი მათზე ნიღბის ტარების მკაცრი რეკომენდაცია გაიცემა.
- საშუალო და მძიმე შემთხვევებისთვის იზოლაციის ვადა არის მინიმუმ 10 დღე, ასევე უნდა აღინიშნებოდეს სიმპტომების მკვეთრი გაუმჯობესების დინამიკა უკანასკნელი 24 საათის განმავლობაში. იზოლაციის დასრულებიდან მომდევნო 5 დღე აუცილებელია ნიღბის გამოყენება.
რაც შეეხება კონტაქტებს, გაბუნიას განცხადებით, ამ შემთხვევაში მცირდება და მსუბუქდება ვადები, კერძოდ:
- ვაქცინირებული კონტაქტისთვის, მათ შორის, ბუსტერ ვაქცინაციის მქონე პირები და პირები, რომლებსაც ჩატარებული აქვთ მხოლოდ პირველი ორი დოზა, ამ დოზების მიღებიდან 14-90 დღის ვადაში ეხსნებათ კარანტინის ვადა, ანუ არ არის საჭირო მათთვის კარანტინი.
- კოვიდგადატანილ პირებს გადატანიდან 60 დღის მანძილზე ნიღბის მოხმარების მკაცრი რეკომენდაციის პირობებში, კონტაქტიდან 10 დღის შემდეგ ეხსნებათ სავალდებულო კარანტინი
- არავქცინირებული პირების შემთხვევაში, რჩება რეკომენდაცია, რომ კოვიდინფიცირებულთან კონტაქტის შემდეგ 8 დღის განმავლობაში დარჩნენ კარანტინში, შემდეგ კი, 9-12 დღის განმავლობაში უნდა გამოიყენონ პირბადე
“ეს ცვლილებები იქნება, რომელიც ძალაში შევა ორშაბათიდან, ახლა მიმდინარეობს ამ პროცესების დაზუსტება”, – განაცხადა გაბუნიამ
ამ დრომდე მოქმედი რეგულაციით, ინფიცირების შემთხვევაში, ადამიანი ვალდებული იყო, კარანტინში ყოფილიყო 13 დღე (ათს პლუს სამი უსიმპტომო დღე).
