საქართველოს პრემიერ-მინისტრი, ირაკლი ღარიბაშვილი პარლამენტის ყოფილ თავმჯდომარეზე საუბრისას, ამბობს, რომ თანამდებობიდან მის წასვლას „შეიძლება დავარქვათ როტაცია, შეიძლება ამას დავარქვათ ბუნებრივი პროცესი“.
საუბარია კახა კუჭავაზე, რომელმაც, 24 დეკემბერს თქვა, რომ თანამდებობას ტოვებს და საქმიანობას პარტიაში გააგრძელებს.
„ჩვენთვისაც გულდასაწყვეტი იყო, ეს მისი გადაწყვეტილებაა და მე მინდა მას მადლობა გადავუხადო, როგორც გუნდის წევრს და ყოფილ პარლამენტის თავმჯდომარეს. უბრალოდ მას აქვს თვისი ხედვა, თავისი გეგმებია ჩვენ ამაზე ვისაუბრეთ და მე იმედი მაქვს კიდევ ვითანამშრომლებთ სხვა პროექტებში,“ – ამბობს ღარიბაშვილი და წარმატებას უსურველს ახალ თავმჯდომარეს – შალვა პაპუაშვილს.
ჟურნალისტის დამატებით კითხვაზე, პარლამენტის თავმჯდომარის სწრაფი ცვლა უნდა აჩენდეს თუ არა კითხვებს, ღარიბაშვილი პასუხობს:
„შეიძლება ამას დავარქვათ როტაცია, შეიძლება ამას დავარქვათ ბუნებრივი პროცესი. საბოლოო ჯამში, გუნდი არის ერთიანი, „ქართული ოცნება“ გუნდი არის ერთიანი აქ პიროვნებებზე ნაკლები აქცენტი უნდა გაკეთდეს,“.
