ახალი ამბები

სააკაშვილის მიმართ არ არის გამოყენებული რაიმე სახის დისციპლინური ღონისძიება – პენიტენციური

8 დეკემბერი, 2021 • 922
სააკაშვილის მიმართ არ არის გამოყენებული რაიმე სახის დისციპლინური ღონისძიება – პენიტენციური

სპეციალური პენიტენციური სამსახურის განცხადებით, ამ დროისთვის მიხეილ სააკაშვილის მიმართ არ არის გამოყენებული რაიმე სახის დისციპლინური ღონისძიება და ინფორმაცია მისთვის შეხვედრების შეზღუდვასთან და ტელევიზორის ჩამორთმევასთან დაკავშირებით სიმართლე არაა.

მათივე თქმით, მიხეილ სააკაშვილის მიმართ დისციპლინურ წარმოება 29 ნოემბრიდანაა დაწყებული და ამას კავშირი არ აქვს სახელმწიფო ინსპექტორის გადაწყვეტილებასთან.

„აღსანიშნავია, რომ დაწესებულების უფლებამოსილი მოსამსახურეების მიერ მსჯავრდებულთან ვიზიტი განპირობებული იყო მისთვის უფლებამოვალეობების ოქმის გაცნობის მიზნით, რაზეც მან უარი განაცხადა და სიტყვიერი შეურაცხყოფა მიაყენა დაწესებულების მოსამსახურეებს.

ამ დროისთვის მიხეილ სააკაშვილის მიმართ არ არის გამოყენებული რაიმე სახის დისციპლინური ღონისძიება მის მიერ ჩადენილი დარღვევის გამო, შესაბამისად, გავრცელებული ინფორმაცია მისთვის შეხვედრების შეზღუდვასთან და ტელევიზორის ჩამორთმევასთან დაკავშირებით არის სიცრუე და ემსახურება საზოგადოებაში უწყების იმიჯის შელახვას.

აქვე აღვნიშნავთ, რომ, N18 დაწესებულების დირექტორის მიერ დისციპლინური წარმოება დაწყებულია 2021 წლის 29 ნოემბრიდან, მას შემდეგ, რაც გაირკვა (ექსპერტიზის დასკვნით), მსჯავრდებულის მიერ დაზიანებული ნივთის ღირებულება 150 ლარზე ნაკლები იყო. ეს ქმედება არ შეიცავდა სისხლის სამართლის დანაშაულის ნიშნებს და სახეზე იყო პატიმრობის კოდექსის მე-80 მუხლით გათვალისწინებული ქმედება, კერძოდ, მსჯავრდებულმა დააზიანა მის პალატაში განთავსებული კარდიომონიტორი

ამ ეტაპზე მსჯავრდებული შეუფერხებლად სარგებლობს როგორც ოჯახის წევრებთან, ასევე მკურნალ ექიმთან შეხვედრის უფლებით. სპეციალური პენიტენციური სამსახურის მხრიდან რაიმე სახის შეზღუდვას მსჯავრდებულის რომელიმე უფლების რეალიზების კუთხით ადგილი არ ჰქონია.

სპეციალური პენიტენციური სამსახური მოუწოდებს მსჯავრდებულ მიხეილ სააკაშვილს, თავი შეიკავოს სამსახურისა და მისი მოსამსახურეების მიმართ ცრუ და დაუსაბუთებელი ბრალდებების გავრცელებისგან“, – ნათქვამია პენიტენციურის განცხადებაში.

საქართველოს მესამე პრეზიდენტი მიხეილ სააკაშვილი აცხადებს, რომ ყველანაირ სამედიცინო მკურნალობას წყვეტს. ამის შესახებ მის წერილშია საუბარი.

სააკაშვილის თქმით, მკურნალობის შეწვეტის მიზეზი მის მიმართ დისციპლინარული ზომების ამოქმედება გახდა, რაც მისი თქმით, შეხვედრების შეზღუდვას და ტელევიზორის ჩამორთმევას გულისხმობს.

გარდა ამისა, მისი თქმით, პროტესტს გააგრძელებს მანამ, სანამ იუსტიციის სამინისტრო და პენიტენციური სამსახური სახელმწიფო ინსპექტორის სამსახურის გადაწყვეტილებას არ შეასრულებს.

ვწყვეტ ყველანაირ სამედიცინო მკურნალობას – სააკაშვილი

მასალების გადაბეჭდვის წესი