ახალი ამბები

სააკაშვილი სამართლიან და ღირსეულ მოპყრობას იმსახურებს – 4 სენატორი

20 ნოემბერი, 2021 • 1888
სააკაშვილი სამართლიან და ღირსეულ მოპყრობას იმსახურებს – 4 სენატორი

მიხეილ სააკაშვილის დაკავებასა და მისი ჯანმრთელობის მდგომარეობას ოთხი ამერიკელი სენატორი – ჯიმ რიში, რონ ჯონსონი, ჯინ შაჰინი და ბენ კარდინი – ეხმაურება.

სენატის საგარეო ურთიერთობათა კომიტეტის სენატორების, ჯიმ რიშის (სენატის საგარეო ურთიერთობათა კომიტეტის წამყვანი რესპუბლიკელი წევრი), რონ ჯონსონის (ევროპის ქვეკომიტეტის თავმჯდომარე) , ბენ კარდინის (ჰელსინკის კომისიის თავმჯდომარე) და ჯინ შაჰინის (ევროპის ქვეკომიტეტის წამყვანი დემოკრატი წევრი) განცხადებას „ამერიკის ხმა“ ავრცელებს.

განცხადების თანახმად, საქართველოს მთავრობამ დაუყოვნებლივ უნდა იმოქმედოს მიხეილ სააკაშვილისთვის საჭირო დახმარების აღმოსაჩენად.

„ყურადღებით ვაკვირდებით ყოფილი პრეზიდენტის, სააკაშვილის სიტუაციას და მკურნალობას, რაც ამერიკის სენატში საქართველოს მეგობრების შეშფოთებას იწვევს. მიუხედავად იმისა, რომ ჩვენ ვაფრთხილებდით, რომ საქართველოში ბატონი სააკაშვილის დაბრუნება პოლიტიკურ პოლარიზებას გააღრმავებდა, ბატონი სააკაშვილი, ისევე როგორც ყველა პატიმარი, რომელიც ელის სასამართლოს, იმსახურებს სამართლიან და ღირსეულ მოპყრობას, საერთაშორისო სტანდარტების და ქართული კანონმდებლობის შესაბამისად. ჩვენ გვაშფოთებს, რომ ეს ახლა ასე არ ხდება.

დაჟინბით მოვუწოდებთ საქართველოს მთავრობას, უზრუნველყოს დამოუკიდებელ მედიკოსთა გუნდის რჩევების გათვალისწინებით, გადაუდებლად, ბატონი სააკაშვილისთვის საჭირო სამედიცინო დახმარების აღმოჩენა. ჩვენ ახლოს ვაკვირდებით სასამართლო პროცესს და ხაზს ვუსვამთ იმის მნიშვნელობას, რომ პროცესი სამართლიანად, გამჭვირვალედ და პირადი დასწრებით წარიმართოს. სამართლიანი და სწრაფი სასამართლო პროცესის უფლება, ნებისმიერი დემოკრატიისთვის ძირითადი დამახასიათებელი ნიშანია და ეს შემთხვევა გამონაკლისი არ არის“, – ნათქვამია განცხადებაში.

4 სენატორი საქართველოს მთავრობას მოუწოდებს, გადადგას პოლიტიკური სიტუაციის სტაბილურობისთვის საჭირო ნაბიჯები.

„ჩვენ დაჟინებით მოვუწოდებთ საქართველოს მთავრობას, უპირატესობა მიანიჭოს სააკაშვილის სიტუაციის სერიოზულობას და გაითვალისწინოს ამ სიტუაციის გავლენა, საქართველოს პოლიტიკურ სტაბილურობაზე.

ახლა დროა პოლიტიკური განსხვავებები ქართველი ხალხის სასარგებლოს გვერდზე გადაიდოს. სიტუაციის ყოველდღიურად დამძიმებასთან ერთად, იზრდება ასევე არასწორი გათვლების გაკეთების რისკებიც, რომელიც შეიძლება ბატონი სააკაშვილის სერიოზული ზიანით ან უარესით დასრულდეს. მსგავს ტრაგედიას, საქართველოს დემოკრატიულ მისწრაფებებზე გრძელვადიანი ნეგატიური გავლენა ექნება.

ჩვენ მოვუწოდებთ ყველა მხარეს, იმოქმედონ ქართველი ხალხის საუკეთესო ინტერესის გათვალისწინებით“, – ამბობენ სენატორები.

მიხეილ სააკაშვილი, რომელსაც 1-ლი ოქტომბრის შემდეგ შიმშილობა ჰქონდა გამოცხადებული, 19-20 ნოემბრის მიჯნაზე, ღამის საათებში გადაიყვანეს გორის სამხედრო ჰოსპიტალში.

მასალების გადაბეჭდვის წესი