ახალი ამბები | ,

კოვიდის სამკურანლო ახალი წამალი FDA-ს ავტორიზაციას ელოდება

12 ოქტომბერი, 2021 | | 1128
კოვიდის სამკურანლო ახალი წამალი FDA-ს ავტორიზაციას ელოდება

ამერიკული ფარმაცევტული კომპანია Merck აშშ-ის საკვებისა და წამლის ადმინისტრაციას (FDA) მიმართავს და COVID-19-ის წინააღმდეგ მისი ექსპერიმენტული ანტივირუსული პრეპარატისთვის გადაუდებელი გამოყენებისთვის ავტორიზაციის მინიჭებას სთხოვს.

როგორც CNN წერს, თუ პრეპარატი ავტორიზაციას მიიღებს, ის პირველი წამალი იქნება კაფსულის ფორმით, რომელსაც კორონავირუსის საწინააღმდეგოდ გამოიყენებენ.

კომპანიის განცხადებით, ავტორიზაციის მინიჭების შემდეგ პრეპარატს გამოიყენებენ ზრდასრულებში, რომლებსაც COVID-19-ის მძიმე ფორმების განვითარებისა და ჰოსპიტალიზაციის რისკი აქვთ. კომპანიის განცხადებით, წამალი 700-ზე მეტ პაციენტში შემთხვევითი შერჩევის პრინციპით გამოსცადეს, სადაც მონაწილეთა ნაწილი იღებდა პრეპარატს, ნაწილი კი- პლაცებოს.

კვლევის ავტორების განცხადებით, მედიკამენტმა შეამცირა ჰოსპიტალიზაციის ან გარდაცვალების რისკი 50%-ით. შედეგების მიხედვით, დამძიმდა ან/და გარდაიცვალა იმ პაციენტების 7.4%, რომლებიც პრეპარატს იღებდნენ მაშინ, როცა პლაცებოს ჯგუფში ასეთი პაციენტების 14.1% იყო.

გამოცემის ცნობით, კვლევაში მონაწილე არცერთი პაციენტი აცრილი არ ყოფილა. აღნიშნული კვლევის შედეგები ჯერჯერობით გადამოწმებული არ არის და არც სამეცნიერო ჟურნალშია გამოქვეყნებული.

კომპანია გეგმავს, 2021 წლის ბოლომდე პრეპარატის იმდენი დოზა დაამზადოს, რამდენიც 10 მილიონი ადამიანის მკურნალობის კურსისთვის იქნება საკმარისი, 2022 წლიდან კი წარმოების ზრდას გეგმავს.

CNN-ის თქმით, Merck-მა აშშ-ის მთავრობას უკვე მიჰყიდა 1.7 მილიონი პაციენტის მკურნალობის სრული კურსისთვის საჭირო მედიკამენტების ოდენობა. კომპანიის განცხადებით, წამლის ფასი მინიმალური იქნება იმისათვის, რომ მსოფლიოს გარშემო მისი ხელმისაწვდომობა მაღალი დარჩეს. ამასთან, კომპანიაში აცხადებენ, რომ ახალი შტამების გაჩენის შემთხვევაში, შესაძლებელი იქნება წამლის მოდიფიკაცია.

მასალების გადაბეჭდვის წესი