21 სექტემბერს, 12-დან 17 საათამდე, „თბილისი – წიგნის მსოფლიო დედაქალაქის“ ფარგლებში, საქართველოში გოეთეს ინსტიტუტის ორგანიზებით, აკაკი წერეთლის სახელობის ბიბლიოთეკაში (ჭავჭავაძის #24), გაიმართება ღონისძიება „100 წიგნი საჩუქრად“.

„გერმანიის საელჩოსთან და გოეთეს ინსტიტუტთან თანამშრომლობას, მორიგი სახალხო აქტივობით ვაგრძელებთ. ახლად რეაბილიტირებულ აკაკი წერეთლის სახელობის ბიბლიოთეკაში მიმდინარე, საუკეთესო გერმანულენოვანი გამოცემების გამოფენის პარალელურად, თბილისის მცხოვრებლებს ვაძლევთ საშუალებას, არა მხოლოდ მხატვრულ კითხვაში მოსინჯონ ძალები, არამედ საჩუქრად წიგნებიც მიიღონ“, – ამბობს „თბილისი – წიგნის მსოფლიო დედაქალაქის“ დირექტორი, ნინია მაჭარაშვილი. 

ბიბლიოთეკის შესასვლელთან მდგარ წიგნების თაროებზე, გერმანული ლიტერატურის 100 ქართული თარგმანი განთავსდება. წიგნები ისე იქნება დალაგებული, რომ არ ჩანდეს მათი ყდა და სახელწოდება. აქტივობაში ჩართვა შეუძლია ნებისმიერ მსურველს, მხოლოდ იმ პირობით, რომ შემთხვევითობის პრინციპით არჩეული წიგნიდან, 2-3 წუთის განმავლობაში, სახალხოდ წაიკითხავს ნებისმიერ მონაკვეთს, რის შემდეგაც არჩეული წიგნი საჩუქრად გადაეცემა. 

ღონისძიების მოდერატორია მწერალი და მთარგმნელი, დათო გაბუნია. 

თაროზე განთავსებული იქნება „სულაკაურის გამომცემლობის, „ინტელექტის“, „ქარჩხაძის გამომცემლობის“, „მელანის“, „დიოგენეს“, „წიგნები ბათუმშისა“ და „პალიტრა L-ის“ გამოცემები. 

 „თბილისი – წიგნის მსოფლიო დედაქალაქი“ UNESCO-ს პროექტია, რომელიც ხორციელდება თბილისის მერიის ფინანსური მხარდაჭერით. პროექტის გენერალური სპონსორია საქართველოს ბანკი.