ახალი ამბები | , ,

“იმედის” მესაკუთრე ირაკლი რუხაძესთან დაკავშირებული კომპანია გახდა

5 აგვისტო, 2021 | | 721
“იმედის” მესაკუთრე ირაკლი რუხაძესთან დაკავშირებული კომპანია გახდა

ტელეკომპანია “იმედის”  მესაკუთრე გახდა ბიზნესმენ ირაკლი რუხაძესთან დაკავშირებული  “Hunnewell Partners”-ის კონტროლირებადი კომპანია. ამის შესახებ ინფორამაციას “იმედი” ტელეკომპანიის ყოფილი მესაკუთრის, ბადრი პატარკაციშვილის ოჯახის მიერ გავრცელებულ განცხადებაზე დაყრდნობით ავრცელებს.

„გვინდა გაცნობოთ, რომ ჩვენმა ოჯახმა ტელეკომპანია „იმედის“ საკუთრების უფლება გადასცა „ჰანიველ პარტნერზის“ (Hunnewell Partners) კონტროლირებად კომპანიას. ტრანზაქცია დასრულდა 2021 წლის აგვისტოში, რასაც წინ უძღოდა საქართველოს კომუნიკაციების ეროვნული მარეგულირებელი კომისიის მხრიდან თანხმობის მიღება. გარიგების პირობებით, მედიაჰოლდინგ „იმედის“ მფლობელი კომპანია „ჯორჯიან მედია ფროდაქშენ გრუფის“ (Georgian Media Production Group) 100%-ანი წილი გადაეცა „მედია ფაინენს გრუპ ბი.ვის“ (Media Finance Group B.V.), რომელიც შედის „ჰანიველ პარტნერზის“ კომპანიათა ჯგუფში.

ჩვენი ოჯახისათვის განვლილი რამოდენიმე წლის განმავლობაში „იმედის“ ფლობა დიდი პასუხისმგებლობა იყო. 2008 წელს, ბადრის ტრაგიკული გარდაცვალებისა და ტელეკომპანიის უკანონო ჩამორთმევის შემდგომ, იძულებული გავხდით მრავალწლიან სასამართლო დავებში ჩავრთულიყავით ჩვენი კანონიერი ინტერესების დასაცავად. „იმედის“ დაბრუნებიდან თითქმის 10 წლის განმავლობაში პატივი გვერგო, გვემუშავა ჩვენს კომპანიაში დასაქმებულ დარგის საუკეთესო პროფესიონალებთან და ძალისხმევა არ დავაკელით, რათა საზოგადოებისათვის შეგვეთავაზებინა დამოუკიდებელი და მიუკერძოებელი მაუწყებლობა. ტელეკომპანია თანდათანობით ძლიერდებოდა და იმსახურებდა მაყურებლის ნდობას. ჩვენი ოჯახი ამაყობს, რომ იმედის ობიექტურმა სამაუწყებლო პოლიტიკამ ფართო აღიარება პოვა ქართულ აუდიტორიაში. ჩვენთვის ეს ისევე მნიშვნელოვანია, როგორც ბადრისთვის იყო თავის დროზე.

მაგრამ, რადგან ბოლო რამოდენიმე წლის განმავლობაში დროის უმეტეს ნაწილს საქართველოს ფარგლებს გარეთ ვცხოვრობთ, არხის მართვაში გვეხმარებოდა „ჰანიველ პარტნერზის“ ხელმძღვანელი, ირაკლი რუხაძე, რომელიც ადრე პირადად ბადრისთან, ხოლო მოგვიანებით ჩვენს ოჯახთანაც თანამშრომლობდა. „ჰანიველ პარტნერზი“ იზიარებს ჩვენს რწმენას, რომ „იმედი“ უნდა იყოს ობიექტური მაუწყებელი, რომელიც არსებით წვლილს შეიტანს საქართველოს დემოკრატიულ განვითარებაში, და მან აიღო ვალდებულება შეინარჩუნოს ტელევიზიის სარედაქციო დამოუკიდებლობისა და პროფესიონალიზმის მაღალი სტანდარტები.

გვჯერა, რომ ჩვენი გადაწყვეტილება იქნება სწორი როგორც იმედის მაყურებლისთვის, ასევე მთლიანად ქართული საზოგადოებისთვის და ჩვენი ოჯახისთვის“, – ნათქვამია ბადრი პატარკაციშვილის ოჯახის მიერ გავრცელებულ განცხადებაში.

ირაკლი რუხაძე არის ლიბერთი ბანკის და ტელეიმედის სამეთვალყურეო საბჭოს თავმჯდომარე. იმედთან ერთად ჰოლდინგში ასევე შედიან ტელეკომპანიები, მაესტრო და GDS.

მასალების გადაბეჭდვის წესი