ნეტგაზეთი | ტყიბულში შახტის თანამშრომლები გაიფიცნენ – პროფკავშირები ტყიბულში შახტის თანამშრომლები გაიფიცნენ – პროფკავშირები – Netgazeti
Batumelebi | RU

ტყიბულში შახტის თანამშრომლები გაიფიცნენ – პროფკავშირები

კომპანიასა და დასაქმებულებს შორის წარუმატებელი მედიაციის შემდეგ, ტყიბულის შახტის თანამშრომელთა ნაწილი ხელფასების გაზრდის მოთხოვნით გაიფიცა. ინფორმაციას “მეტალურგთა, მეშახტე-მაღაროელთა და ქიმიკოსთა პროფკავშირები” ავრცელებს.

“როგორც თავად [თანამშრომლები] ამბობენ, ამჟამად მათი ხელფასი შეადგენს 450-800 ლარს (პოზიციების მიხედვით), რაც მათი თქმით შესრულებული სამუშაოს სიმძიმისა და სამომხმარებლო პროდუქტებზე დღეს არსებული ფასების შესაბამისი არ არის”, – დასძენს ორგანიზაცია.

როგორც “ნეტგაზეთს” ხსენებული პროფკავშირის ხელმძღვანელმა, თამაზ დოლაბერიძემ განუცხადა, გაფიცულია 400-მდე თანამშრომელი, რომლებიც შპს “საქნახშირის” მოძრაობის უბანსა და ზედაპირულ კომპლექსში არიან დასაქმებულნი. პროცესი 3 ივლისის 06:00 საათიდან დაიწყო.

“სიტუაცია უცვლელია. ჯერ კომპანიისგან გამოხმაურება არ არის, თუმცა მისი პოზიცია ცნობილია: მედიაცია უშედეგოდ დამთავრდა, კომპანიამ უარი თქვა ხელფასების მომატებაზე და ამან მიიყვანა ხალხი გაფიცვამდე”, – აღნიშნავს ის.

“ნეტგაზეთი” დაუკავშირდა შპს “საქნახშირს”, სადაც გვითხრეს, რომ კომპანიის პოზიცია მოგვიანებით, საკონსულტაციო საბჭოს შეკრების შემდეგ გახდება ცნობილი.

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან