ოზურგეთში ფქვილის გადამამუშავებელი საწარმოს თანამშრომლები უკვე მე-7 დღეა გაფიცულები არიან.

ისინი ხელფასების მატებასა და შრომითი პირობების გაუმჯობესებას მოითხოვენ.

გაფიცულთა ადვოკატმა, თინათინ ბასილაშვილმა ნეტგაზეთს განუცხადა, რომ ხვალ, 11 მაისს გაიმართება გაფიცულებსა და კომპანიის ადმინისტრაციის წარმომადგენლებს შორის შეხვედრა, სადაც მხარეები საერთო პოზიციის შეჯერებას შეეცდებიან.

“ერთ მაგიდასთან დასხდება ორივე მხარე და იმედია, რომ რაიმე შედეგს დავდებთ ხვალ”, – უთხრა მან ნეტგაზეთს.

გაფიცვის პარალელურად, სოციალურ ქსელში მოქალაქეთა ნაწილმა გაფიცულებისთვის დაიწყო ფულის შეგროვება, რათა ამ გზით სოლიდარობა გამოუცხადონ მათ.