საქართველოს ჯანდაცვის მინისტრი ეკატერინე ტიკარაძე აცხადებს, რომ COVAX პლატფორმასთან ქვეყნის თანამშრომლობამ და განხორციელებულმა ნაბიჯებმა განაპირობა, რომ 1 მილიონი დოზა Pfizer-ის მიღება “სიზმარი აღარ არის”. თუმცა ტიკარაძე კვლავ არ საუბრობს, როდის მიიღებს ქვეყანა აღნიშნული წარმოების ვაქცინებს:
“COVAX პლატფორმასთან ნაწარმოები მოლაპარაკებებისა და ვაქცინაციის კალენდრით, მოგვეცა უფლება, გამოგვეყენებინა არა მხოლოდ Astrazeneca-ს, არამედ მსოფლიოში ერთ-ერთი ყველაზე მოთხოვნადი Pfizer-ის ვაქცინა. ისეთი ქვეყნებიდან, როგორიც საქართველოა, მხოლოდ 3 მონაწილეობს ამ ვაქცინის ვაქცინაციაში, ვინაიდან ყველასთვის ცნობილია, რაოდენ რთულია იმ ცივი ჯაჭვის და პირობების დაცვა, რომელიც ამ ვაქცინას ესაჭიროება და მწარმოებლის მხრიდან არის დათქმული.
სწორედ გამომდინარე იქიდან, რომ ეს პროცესი სწორად იყო წამართული მოგვეცა შესაძლებლობა, დამატებითი მოლაპარაკებები გვეწარმოებინა უკვე მწარმოებელთან და დღესდღეობით, ვართ იმ მოლოდინის რეჟიმში, რომ გაჟღერებული მილიონი დოზა Pfizer დღესდღეობით აღარ არის სიზმარი. უკვე მიმდინარეობს კონკრეტული ქმედითი ნაბიჯების გადადგმა და თარიღების დაზუსტება, როდის იქნება ეს ვაქცინა ქვეყანაში ხელმისაწვდომი”, — ამბობს ეკატერინე ტიკარაძე.
მისი თქმით, დღესდღეობით, საქართველოს აქვს გარანტია, რომ უწყვეტად მიიღებს Sinopharm-ის ვაქცინის 350 ათას, Pfizer-ის ვაქცინის მილიონ და ასევე, Astrazeneca-ს 100 ათას დოზას.
ჯანდაცვის მინისტრი ამბობს, რომ მათ მიერ გადადგმული წარმატებული ნაბიჯების შედეგად, სამინისტროსთან კომუნიკაციაზე გამოვიდა ვაქცინის კიდევ ერთი მწარმოებელი Jonson&Jonson, რომელიც რამდენიმე თვის წინ უარს აცხადებდა საქართველოსთან მოლაპარაკებებზე:
“ის წარმატებული და ქმედითი ნაბიჯები, რომელიც ჩვენი ევროპელი და ამერიკელი პარტნიორების მხრიდან ეფექტურად და სწორად ჩაითვალა, გვაძლევს შესაძლებლობებს. სწორედ დღეს ჩვენთან Jonson&Jonson გამოვიდა კონტაქტზე, რომელიც სულ რამდენიმე თვის წინ უარს აცხადებდა საქართველოთან მოლაპარაკებებზე. დღეს ისიც მზად არის, გავიაროთ კონსულტაციები. ასევე, ინტენსიური მოლაპარაკებები მიმდინარეობს Moderna-სთან და მასთან დაკავშირებითაც თარიღებზე მიმდინარეობს მოლაპარაკებები.
თითოეული ეს მოლაპარაკება გულისხმობს გაუთქმელობის ხელშეკრულებაზე ხელმოწერას, აქედან გამომდინარე, მე ბოდიშს მოვიხდი, რომ მეტ დეტალზე ვერ ვისაუბრებ, თუმცა ხარისხიანი ვაქცინების უსაფრთხო მოწოდება ჩვენს მოქალაქეებს შემდგომ პერიოდში ექნებათ” ,— ამბობს ტიკარაძე.
13 აპრილს აშშ-ის საკვებისა და წამლის ადმინისტრაციამ განაცხადა, რომ Jonson&Jonson-ის ვაქცინით აცრილი 6.8 მილიონი ადამიანიდან 6 პირს იშვიათი თრომბოემბოლიური გართულება გამოუვლინდა. როგორც BBC წერს, შემთხვევები იდენტურია იმ გართულებებისა, რომელიც AstraZeneca-ს ვაქცინის შემთხვევაშიც გამოვლინდა. აღნიშნული ორი ვაქცინა ერთი და იმავე ტექნოლოგიითაა დამზადებული.
Johnson&Johnson-ის ვაქცინის შემთხვევაში ექვსივე ამგვარი გართულება 18-დან 48 წლის ქალებში ვაქცინაციიდან მე-6-დან მე-13 დღემდე პერიოდში გამოვლინდა.
FDA-ის რეკომენდაციის შემდეგ, აშშ-ში ვაქცინის გამოყენება დამატებითი კვლევების გამოქვეყნებამდე შეჩერდა. მსგავსი გადაწყვეტილება მიიღეს სამხრეთ აფრიკის რესპუბლიკამ და ევროპის ქვეყნებმაც.
როგორც BBC წერს, ევროკავშირში ვაქცინის მიწოდება აღნიშნულ განცხადებამდე 24 საათით ადრე დაიწყო და იმ დროისათვის ევროკავშირის ქვეყნებში J&J-ის ვაქცინით იმუნიზაცია დაწყებული არ ყოფილა.
რაც შეეხება ბრიტანეთს, Johnson & Johnson-ს ბრიტანეთში ავტორიზაცია ჯერ არ აქვს მინიჭებული, თუმცა ქვეყანას 30 მილიონი დოზა წინასწარ აქვს შესყიდული. ვაქცინა წინასწარ შეძენილი აქვს კანადასაც, კერძოდ, პრეპარატის 10 მილიონი დოზა ქვეყანას თვის ბოლოს უნდა მიეღო.
