ახალი ამბები |

ვგმობთ გოგი წულაიას მხარდამჭერ განცხადებას პარტიების მხრიდან – „ქალთა მოძრაობა“

22 აპრილი, 2021 | | 290
ვგმობთ გოგი წულაიას მხარდამჭერ განცხადებას პარტიების მხრიდან – „ქალთა მოძრაობა“

„ქალთა მოძრაობა“ და ქალთა ორგანიზაციები გმობენ პოლიტიკური პარტიების მხარდამჭერ განცხადებას სქესობრივ ძალადობაში ბრალდებულ გოგი წულაიას მიმართ. „პარტიების მხარდამჭერი განცხადება გოგი წულაიას მიმართ არის უკიდურესად შემაშფოთებელი“, – აცხადებენ ისინი.

20-ზე მეტმა პარტიამ, მათ შორის ენმ-მ, „სტრატეგია აღმაშენებელმა“, „ევროპულმა საქართველომ“, „ლელომ“ და სხვებმა, 22 აპრილს გოგი წულაიას მხარდამჭერი განცხადება გაავრცელა. პარტიებმა განაცხადეს, რომ საქმეში პოლიტიკური ქვეტექსტი ნათლად ჩანს.

მათ განცხადებაში ნათქვამია, რომ „გოგი წულაიას აღმკვეთი ღონისძიების სახით წინასწარი პატიმრობა შეეფარდა, როცა ანალოგიური ბრალდებების დროს პრაქტიკულად არასდროს აღმკვეთი ღონისძიების ეს ფორმა არ გამოიყენება, უდავოდ მიუთითებს შერჩევით სამართალსა და ხელისუფლების პოლიტიკურ მოტივზე“.

საპასუხო განცხადებაში უფლებადამცველი ორგანიზაციემი მიუთითებენ, რომ „138-ე მუხლი წარმოადგენს მძიმე დანაშაულს და ასეთი ქმედებისთვის, მოცემულ საქმეზე არსებული რისკებისა და საფრთხეების გათვალისწინებით, პატიმრობის შეფარდება მიზანშეწონილია, განსაკუთრებით მაშინ, როდესაც ბრალდებული არის გავლენიანი ფიგურა და შეუძლია ხელი შეუშალოს საქმეზე ჭეშმარიტების დადგენას, მათ შორის, დაზარალებულზე ზეწოლის გზით“.

„პარტიები აღნიშნავენ, რომ „ანალოგიური ბრალდებების დროს პრაქტიკულად არასდროს აღმკვეთი ღონისძიების ეს ფორმა არ გამოიყენება“, თუმცა ეს ინფორმაცია არ დასტურდება სტატისტიკით“, – აცხადებს „ქალთა მოძრაობა“.

დღეს საქალაქო სასამართლომ განაცხადა, რომ 2019-2021 წლებში  აღნიშნული ბრალდებით თბილისის საქალაქო სასამართლოში შემოვიდა 7 შუამდგომლობა, საიდანაც  მოსამართლის განჩინების საფუძველზე  6 შემთხვევაში ბრალდებულის მიმართ  გამოყენებულ იქნა პატიმრობა, ხოლო ერთ სისხლის სამართლის საქმეზე აღკვეთის ღონისძიების შუამდგომლობის განხილვის ეტაპზე მხარეებს შორის გაფორმდა  საპროცესო შეთანხმება,  სადაც ბრალდებულს სასჯელის სახედ განესაზღვრა თავისუფლების აღკვეთა.

ქალთა მოძრაობა ასევე აცხადებს:

„პირველ რიგში, შეგახსენებთ, რომ სექსუალური ძალადობის შესახებ დაწყებული გამოძიებებისა და პასუხისგებაში მიცემულ პირთა რიცხვი ისედაც დაბალია ამ ქვეყანაში, მართლმსაჯულების სისტემა არ არის მგრძნობიარე და ორიენტირებული მსხვერპლის დაცვაზე და შეღავათიანი და მსუბუქი დამოკიდებულება სექსუალური მოძალადეების მიმართ ზოგადად არის პრობლემა. იმის მაგივრად, რომ პარტიები ითხოვდნენ სექსუალურ ძალდობაში მხილებული პირების მიმართ მკაცრი სისხლისსამართლებრივი პოლიტიკის გატარებას, ისინი მოუწოდებენ მართლმსაჯულების სისტემას, შეღავათი გაუწიოს პოლიტიკოს კაცს და ზოგადად შეინარჩუნოს ქვეყანამ არასერიოზული და ხელის შემწყობი დამოკიდებულება სექსუალური მოძალადეების მიმართ. ასეთი დამოკიდებულება აზიანებს ყველა სექსუალური ძალადობის მსხვერპლს და აქეზებს მოძალადეებს.

არსებული პრაქტიკა მიუთითებს, რომ 138-ე და სხვა სქესობრივი დანაშაულების დროს აღკვეთის ღონისძიების სახით, როგორც წესი, გამოიყენება პატიმრობა საქართველოში და სასურველია გამკაცრდეს სისხლის სამართლის პოლიტიკა ასეთ დანაშაულებზე, არათუ შემსუბუქდეს და გაგრძელდეს სექსუალური მოძალადეების მიმართ შემწყნარებლური დამოკიდებულება.

ამასთან, აღნიშნულ საქმეზე, ცდილობენ რა პარტიები გამოიყვანონ ეს საქმე პოლიტიკურ დევნად, ხშირად გამოიყენებენ ტერმინებს „დანაშაულის პროვოცირებას“, რაც არის სრულიად მიუღებელი და არასწორი დამოკიდებულება ზოგადად სექსუალური ძალადობის საქმეების მიმართ.

შეგახსენებთ, რომ დანაშაულის პროვოკაცია ნიშნავს სხვა პირის დაყოლიებას დანაშაულის ჩასადენად, რომელიც უნდა ხდებოდეს, როგორც წესი, ადამიანის ფსიქიკაზე აქტიური ზემოქმედებით და არა უბრალოდ პირობების შექმნით; ყველაზე ხშირად დანაშაულის პროვოკაცია გვხვდება კომერციული მოსყიდვის, ნარკოტიკული დანაშულების და ქრთამის მიცემის ან აღების დროს. მიუხედავად იმისა, რომ პროვოკაციული საქმიანობა თეორიულად შეიძლება განხორციელდეს ნებისმიერი დანაშაულის ჩასადენად, ჩვენთვის წარმოუდგენელია, თუ როგორ უნდა მოხდეს სექსუალური ძალადობის დანაშაულის პროვოცირება. ფაქტობრივად, გვეუბნებიან, რომ სექსუალური ძალადობა შეიძლება გამოიწვიოს ქალმა.

განსაკუთრებით უადგილოა დანაშაულის პროვოცირებაზე საუბარი ამ კონკრეტულ საქმეში, სადაც გოგი წულაია თავად დაუკავშირდა მსხვერპლს, თავად შესთავაზა საქმიანი ვიზიტი თბილისში, თავად დაიქირავა ბინა, სადაც განახორციელა ძალადობა. მსხვერპლის მიერ თვითდახმარების რეჟიმში განხორციელებული ფარული ჩანაწერით (რომლის ნაწილი ასევე საჯაროდ გაშუქდა მედიით) თავად გოგი წულაიაც ადასტურებს, რომ სწორედ მის მიერ ხდებოდა სქესობრივი კონტაქტის შეთავაზება, რაზეც არაერთხელ მიიღო ქალის უარი და ამის შემდეგ გოგი წულაია გადავიდა ფიზიკურ ძალადობაზე, რის შედეგადაც როგორც მოძალადემ, ისე მსხვერპლმა მიიღეს ფიზიკური დაზიანებები. ამდენად, აშკარაა, რომ მსხვერპლის მხრიდან ადგილი არ ჰქონია დანაშაულის პროვოკაციას და მასზე ფსიქოლოგიურ ზეწოლას, ვინაიდან ამ პროცესში განხორციელებული ყველა აქტივობის ინიციატორი თავად ბრალდებული იყო.

აღნიშნულ საქმეში გოგი წულაიას პოლიტპატიმრად შერაცხვის მცდელობა არის განპირობებული პარტიული მიკერძოებულობით და მოკლებულია საფუძველს. პოლიტიკური პარტიების მიერ სექსუალური მოძალადის მხარდაჭერა და მისთვის შეღავათიანი აღკვეთის ღონისძიებების მოთხოვნა კი წარმოადგენს სექსუალური ძალადობის მსხვერპლების დისკრიმინაციას და მოძალდეების მხარდაჭერას“.

ორგანიზაციები მოუწოდებენ:
– პოლიტიკურ პარტიებს, გაიწვიონ ხელმოწერები აღნიშნული განცხადებიდან;
– მედიებს, თავი შეიკავონ სექსუალური ძალადობის შემთხვევების „დანაშაულის პროვოცირებად“ შერაცხვისაგან.

განცხადებას ხელს აწერენ ორგანიზაციები:

  • ქალთა მოძრაობა
  • „საფარი“
  • „ქალები საქართველოდან“
  • „ქალები საერთო მომავლისთვის (WECF)“

გირჩევთ ასევე:

ვემიჯნებით – დეკანოიძე და ჭალიძე პარტიების მიერ წულაიას მხარდამჭერ განცხადებაზე

მასალების გადაბეჭდვის წესი