ნეტგაზეთი | “სასიცოცხლოდ მნიშვნელოვანი” – მიხეილ დაუშვილი ნამახვანი ჰესის პროექტზე “სასიცოცხლოდ მნიშვნელოვანი” – მიხეილ დაუშვილი ნამახვანი ჰესის პროექტზე – Netgazeti
RU | GE  

“სასიცოცხლოდ მნიშვნელოვანი” – მიხეილ დაუშვილი ნამახვანი ჰესის პროექტზე

“ქართული ოცნების” ყოფილი წევრი და ექს-პრემიერ გიორგი გახარიას თანაგუნდელი მიხეილ დაუშვილი ამბობს, რომ ნამახვანი ჰესთან დაკავშირებით “გარკვეული ხარვეზები” მთავრობასა და მოსახლეობას შორის კომუნიკაციას უკავშირდება. ამის შესახებ მან “მთავარი არხის” ეთერში ისაუბრა.

“ნამახვანის შემთხვევაში ჩვენ ცალსახად გვჭირდება ჰესები, ენერგოდამოუკიდებლობის გაძლიერება. ნამახვანთან დაკავშირებით შეიძლება ითქვას, რომ გვქონდა გარკვეული ხარვეზები და ეს ხარვეზები ძირითადად უკავშირდება მოსახლეობასთან კომუნიკაციას. მე ვფიქრობ, რომ უკეთესი კომუნიკაცია რომ გქვონოდა მოსახლეობასთან, ამ ჰესის მშენებლობა ასეთი პრობლემური არ გახდებოდა”, — აცხადებს დაუშვილი.

მისივე თქმით, მოსახლეობა უნდა დაარწმუნონნ, რომ ჰესის პროექტი ტექნიკურადაც, ეკონომიკურადაც და შინაარსობრივადაც გამართულია.

“ნამახვანის აშენება, რა თქმა უნდა, მნიშვნელოვანია, მაგრამ ძირითადი დატვირთვა არ უნდა მოდიოდეს ძალის გამოყენებაზე, არამედ აქცენტი უნდა გაკეთდეს მოსახლეობასთან სწორ კომუნიკაციაზე და მათი დარწმუნება უნდა მოხდეს, რომ ეს პროექტი ტექნიკურადაც, ეკონომიკურადაც და შინაარსობრივადაც აბსოლუტურად გამართული და უბრალოდ  სასიცოცხლოდ მნიშვნელოვანია ჩვენი ქვეყნის განვითარებისთვის და ენერგოდამოუკიდებლობისთვის. მარტივად, იმ მიზეზით, რომ ნაკლებად დამოკიდებული ვიყოთ ჩვენს მეზობელ ოკუპანტ ქვეყანაზე”, — განაცხადა დაუშვილმა.


ბოლოდროინდელი მოვლენები

14 აპრილს, დილის საათებში, გათენებამდე, პოლიციამ გუმათჰესთან რკინის ბარიკადები აღმართა იმ ადგილას, სადაც აპრილის დასაწყისიდან პოლიციის ბლოკპოსტი იყო განთავსებული.

ამაზე პასუხად, რამდენიმე საათში, დემონსტრანტებმა ბარიკადებზე მუშტების ბრაგუნი დაიწყეს და განაცხადეს, რომ ეს ხმაური არის „ქართველი ხალხის ხმა“, რითაც აპროტესტებენ „რიონის ხეობის გაყიდვას“.

ცოტა ხანში პოლიციამ დემონსტრანტებს მოსთხოვა, შეეწყვიტათ „აგრესიული ქმედებები“, რაზეც პროტესტის ლიდერებმა განაცხადეს, რომ მათი პერფორმანსი არა აგრესიის გამომხატველი არამედ მშვიდობიანი, თუმცა ხმაურიანი იყო.

პოლიციის ადგილობრივ უფროსთან რამდენიმეწუთიანი დიალოგის შემდეგ, „რიონის ხეობის მცველებმა“ განაცხადეს, რომ შსს-ს 10-წუთიან ვადას აძლევდნენ, რათა დაესაბუთებინა, კონკრეტულად რომელი კანონის რომელი მუხლი უკრძალავს მათ „ბარიკადებზე მშვიდობიანად მუშტების ბრაგუნს“.

10-წუთიანი ვადის გასვლის შემდეგ მათ ხმაური განაახლეს, თუმცა ამის შემდეგ პოლიციის კორდონი ბარიკადის უკანა მხრიდან გამოვიდა და დემონსტრანტებსა და რკინის ჯებირებს შორის ჩადგა.

სწორედ ამ წუთებში მოხდა მორიგი დაპირისპრება პოლიციასა და დემონსტრანტებს შორის. „ხეობის მცველების“ ინფორმაციით, ერთ-ერთმა ადამიანმა, რომელიც მათ მხარეს იდგა, ბოთლი ისროლა პოლიციის მიმართულებით, რაც მათ დაგმეს და აღნიშნულ ადამიანს პროვოკატორი უწოდეს.

ვარლამ გოლეთიანმა გამოაცხადა: „ვინც ძალადობით გამოირჩევა, პროვოკატორად ჩაითვალოს და გავუშვათ აქციიდან“. მისი თქმით, ძალადობა არ არის დემონსტრანტების გზა და ვინც ამ ხერხს მიმართავს, დემონსტრაციის წინააღმდეგ მიდის.

13 აპრილს, გვიანობამდე, რიონის ხეობაში დაძაბულობა იყო პოლიციასა და „რიონის ხეობის მცველებს“ შორის.

ნამახვანჰესის მშენებლობის მოწინააღმდეგე „რიონის ხეობის მცველებს“ სოფელ გუმათში საავტომობილო გზა პროტესტის ნიშნად ჰქონდათ გადაკეტილი.

დემონსტრანტები მოითხოვდნენ, რომ პოლიციას მოეხსნა გუმათჰესთან აღმართული ბლოკპოსტი და მისცემოდათ მათ გადაადგილების უფლება სოფელი ნამოხვანისკენ, სადაც თვეების განმავლობაში ჰქონდათ აღმართული კარვები.

მათი მოთხოვნა, — ძირითად მოთხოვნებთან (მშენებლობის შეჩერება, კომპანიის მიერ ხეობის დატოვება) ერთად, — ძალაში რჩება.

ნეტგაზეთის მასალების სხვა გამოცემებში გადაბეჭდვის წესი
ავტორი