ნეტგაზეთი | “მივესალმებით საპატრიარქოს განცხადებას ნამახვანი ჰესზე” – ეკონომიკის და გარემოს დაცვის სამინისტროები “მივესალმებით საპატრიარქოს განცხადებას ნამახვანი ჰესზე” – ეკონომიკის და გარემოს დაცვის სამინისტროები – Netgazeti
RU | GE  

“მივესალმებით საპატრიარქოს განცხადებას ნამახვანი ჰესზე” – ეკონომიკის და გარემოს დაცვის სამინისტროები

ეკონომიკისა და მდგრადი განვითარების და გარემოს დაცვისა და სოფლის მეურნეობის სამინისტროები მიესალმებიან საპატრიარქოს განცხადებას, რომელიც ნამახვანი ჰესის გარშემო მიმდინარე მოვლენებს უკავშირდება და დიალოგის გამართვის აუცილებლობაზეა საუბარი:

“მივესალმებით საქართველოს საპატრიარქოს განცხადებას „ნამახვანი ჰესის“ პროექტთან დაკავშირებით დიალოგის გამართვის აუცილებლობაზე. ეკონომიკისა და მდგრადი განვითარების სამინისტრო და გარემოს დაცვისა და სოფლის მეურნეობის სამინისტრო კიდევ ერთხელ მიმართავენ საპროტესტო აქციების ორგანიზატორებს, ყველა სადავო საკითხი განხილულ იქნას დიალოგის რეჟიმში, რათა ყველა შეკითხვას გაეცეს ამომწურავი პასუხი და საზოგადოებას მიეწოდოს.ამომწურავი, ობიექტური ინფორმაცია” ,- აცხადებენ სამინისტროებში.

აღნიშნული უწყებები მიიჩნევენ, რომ “სრულიად მიუღებელი და დაუშვებელია ვითარების შემდგომი ესკალაცია, საპროტესტო აქციის მონაწილეების მიერ დაყენებული მოთხოვნების კატეგორიული ტონი, რომელიც არ ტოვებს ადგილს დიალოგისა და პოზიციათა დაახლოებისთვის”.

გარემოს დაცვისა და ეკონომიკის სამინისტროების თქმით, დიალოგს ალტერნატივა არ აქვს და მხოლოდ ამ გზით არის შესაძლებელი სადავო საკითხების მოგვარება:

“იმედი გვაქვს, რომ საპროტესტო აქციების ორგანიზატორები, საქართველოს საპატრიარქოს მოწოდების შემდეგ, თანხმობას განაცხადებენ დიალოგზე და ყველა ერთად მივიღებთ გადაწყვეტილებას, რომელიც მთელი საზოგადოების ინტერესებში იქნება და ხელს შეუწყობს ჩვენი ქვეყნის განვითარებას.

აქციის ორგანიზატორების ბრალდების პასუხად ვიტყვით, რომ ჩვენ არ შეგვიწყვეტია დიალოგის პროცესი და დღესაც აქტიურად მიმდინარეობს კომუნიკაცია სამეცნიერო და ექსპერტული ჯგუფებისა და არასამთავრობო სექტორის წარმომადგენლებთან „ნამახვანი ჰესის“ პროექტთან დაკავშირებული კვლევების შესწავლის კუთხით.

ვფიქრობთ, ამ ფორმატით ურთიერთობამ უფრო გამჭვირვალე გახადა ამ მნიშვნელოვანი ენერგეტიკული ობიექტის განხორციელების პროცესი. იმედი გვაქვს, რომ კვლევების შესწავლის შემდეგ პროფესიულ საზოგადოებაში აღარ იქნება შეკითხვები „ნამახვანი ჰესის“ უსაფრთხოების შესახებ. აღნიშნული პროცესი პოზიციების საბოლოო შეჯერებამდე გაგრძელდება”, – წერია განცხადებაში.

საპატრიარქო: შემაშფოთებელია დაძაბულობა, რომელიც რიონის ხეობაში მიმდინარე პროცესებს ახლავს

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.