ნეტგაზეთი | NGO-ები: სასურველია, საზოგადოებას მეტი ინფორმაცია მიეწოდოს მედიაციის პროცესზე NGO-ები: სასურველია, საზოგადოებას მეტი ინფორმაცია მიეწოდოს მედიაციის პროცესზე – Netgazeti
RU | GE  

NGO-ები: სასურველია, საზოგადოებას მეტი ინფორმაცია მიეწოდოს მედიაციის პროცესზე

არასამთავრობო ორგანიზაციები ევროკავშირის მედიაციასთან დაკავშირებით განცხადებას ავრცელებენ და აღნიშნავენ, რომ მიესალმებიან ევროკავშირის და აშშ-ის ჩართულობას ქვეყანაში არსებული პოლიტიკური კრიზისის განმუხტვის პროცესში.

განცხადების ხელმომწერების თქმით, ამ მხრივ, განსაკუთრებით მნიშვნელოვანია, ევროპული საბჭოს პრეზიდენტის სპეციალური წარმომადგენლის, ქრისტიან დანიელსონის როლი ხელისუფლებასა და ოპოზიციურ ძალებს შორის მედიაციის პროცესის წარმართვაში.

ორგანიზაციები აღნიშნავენ, რომ დასაფასებელია, რომ საქართველოში პირველი ვიზიტის დაწყებისთანავე, დანიელსონი შეხვდა სამოქალაქო საზოგადოების წარმომადგენლებს და მოისმინა მათი ხედვა, თუ როგორ უნდა განიმუხტოს ქვეყანაში შექმნილი პოლიტიკური კრიზისი. ასევე, მათი თქმით, სპეციალური წარმომადგენლის დახმარებითა და ძალისხმევით, პოლიტიკურმა ძალები დაუბრუნდნენ მოლაპარაკების პროცესს და გამართეს შეხვედრების სერია:

“სამწუხაროდ, ბატონი დანიელსონის აქტიური ჩართულობის მიუხედავად, მხარეთა შორის კონსენსუსის მიღწევა ამ დრომდე ვერ ხერხდება. ხელმომწერი ორგანიზაციები სინანულს გამოვთქვამთ, რომ მედიაციის პროცესში დახურულ კარს მიღმა მიმდინარეობს და საზოგადოებისთვის ნაკლებად გამჭვირვალეა. აღნიშნული კი საშუალებას აძლევს როგორც ხელისუფლებას, ასევე, ოპოზიციას, შეთანხმების მიუღწევლობა ერთმანეთს გადააბრალონ”, – აცხადებენ NGO-ები.

განცხადების ავტორების თქმით, იმის გათვალისწინებით, რომ ევროკავშირი აგრძელებს მხარეებს შორის მედიაციას, სამოქალაქო საზოგადოების წარმომადგენლები გამოთქვამენ სურვილს, მიუკერძოებელ და ნეიტრალურ მედიატორთა მხრიდან, საზოგადოებას მიეწოდოს მეტი ინფორმაცია უშუალოდ მედიაციის პროცესის, ამ პროცესში პოლიტიკური ძალების პასუხისმგებლობისა და შედეგების შესახებ.

განცხადების ავტორები მიიჩნევენ, რომ მედიაციის ამგვარად წარმართვა ხელს შეუწყობს მოსახლეობის ინფორმირებულობის გაზრდას და მოხდება დამატებით სპეკულაციების, დეზინფორმაციისა და ანტიევროპული ნარატივების გაძლიერების თავიდან აცილება, როგორც ქვეყნის შიგნით, ასევე – მის საზღვრებს გარეთ.

განცხადებას ხელს აწერენ:

  • ადამიანის უფლებათა ცენტრი
  • კავშირი საფარი (HRHT)
  • ინიციატივა მოწყვლადი ჯგუფების რეაბილიტაციისათვის
  • ტოლერანტობის და მრავალფეროვნების ინსტიტუტი (TDI)
  • საქართველოს დემოკრატიული ინიციატივა (GDI)
  • საერთაშორისო გამჭვირვალობა-საქართველო
  • ადამიანის უფლებების სწავლებისა და მონიტორინგის ცენტრი (EMC)
  • დემოკრატიის კვლევის ინსტიტუტი
  • სამართლიანი არჩევნებისა და დემოკრატიის საერთაშორისო საზოგადოება (ISFED)
  • უფლებები საქართველო
  • დემოკრატიისა და უსაფრთხო განვითარების ინსტიტუტი (IDSD)
  • საქართველოს ღია საზოგადოების ფონდი (OSGF)
ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.