“საერთაშორისო გამჭვირვალობა-საქართველომ” (TI) სახელმწიფო რწმუნებულის ადმინისტრაციების თანამდებობის პირების მიერ 2020 წელს შევსებულ დეკლარაციებში დარღვევები გამოავლინა.
TI-ის ცნობით, 46 მოქმედი და ყოფილი თანამდებობის პირიდან დეკლარაცია ათმა ხარვეზებით შეავსო, საიდანაც 7 შემთხვევაში თანამდებობის პირს კერძო კომპანიაში არსებული წილი მართვის უფლებით სხვა პირისთვის არ გადაუცია. 4 შემთხვევაში კი საერთოდ არ აქვს დეკლარირებული თავის ან ოჯახის წევრის საკუთრებაში არსებული კომპანიები.
TI-ის ცნობითვე, თანამდებობის პირების ქონებრივი მდგომარეობის შესახებ დეკლარაციების შემოწმების საკითხი კორუფციასთან ბრძოლის ერთ-ერთი მნიშვნელოვანი ინსტრუმენტია. შესაბამისად, ორგანიზაცია მიმართავს საჯარო სამსახურის ბიუროს, ამ ინფორმაციის საფუძველზე შეისწავლოს კვლევაში აღნიშნული პირების ქონებრივი მდგომარეობის დეკლარაციები შესაბამისი რეაგირების მიზნით.
“საერთაშორისო გამჭვირვალობა — საქართველოს” მიხედვით, თანამდებობის პირებს აქვთ შემდეგი სახის დარღვევები:
ლევან კიკნაველიძე — იმერეთში სახელმწიფო რწმუნებულის მოადგილე
ლევან კიკნაველიძეს 2020 წლის ოქტომბერში შევსებულ დეკლარაციაში არ უხსენებია, რომ იგი არის შპს “სასარგებლო წყალი ნაბეღლავის” 100% წლის მფლობელი და დირექტორი და შპს “ჯორჯიან ფეროელოის” დირექტორი.
ლევან კიკნაველიძე ასევე არის შპს “გამა 222” -ის 50% წილის და შპს “ალიანსი 222” – ის 30% წილის მფლობელი, ეს ინფორმაცია მან ასახა დეკლარაციაშიც, თუმცა, კანონის მოთხოვნის მიუხედავად, მას აღნიშნულ წილები მართვის უფლებით სხვა პირისათვის არ გადაუცია.
ლევან კიკნაველიძეს დეკლარაციაში არ მიუთითებია, რომ მისი მეუღლე ქეთევან ძიგრაშვილი ს.პ.ს “ძიგრაშვილი და კონსალტინგ ჯგუფის” ერთ-ერთი დამფუძნებელი და დირექტორია, რაც კანონის დარღვევაა.
ალექსანდრე მოწერელია — სამეგრელო-ზემო სვანეთის ყოფილი სახელმწიფო რწმუნებული
ალექსანდრე მოწერელია სამეგრელო-ზემო სვანეთის სახელმწიფო რწმუნებულის პოზიციას 2018-20 წლებში იკავებდა, ამჟამად კი საქართველოს პარლამენტის წევრია.
2020 წლის სექტემბერში შევსებულ დეკლარაციაში მოწერელიას არ უხსენებია, რომ მისი მეუღლე, ლალი ხუადე ფლობს 50%-იან წილებს ორ კომპანიაში: შპს „გ.გ.გ.“ და შპს „ანამო“, რაც საჯარო დაწესებულებაში ინტერესთა შეუთავსებლობისა და კორუფციის შესახებ კანონის დარღვევაა.
ლუდუკ ხასია – სამეგრელო-ზემო სვანეთის სახელმწიფო რწმუნებულის მოადგილე
ლუდუკ ხასიას 2020 წლის ოქტომბერში შევსებულ დეკლარაციაში არ უხსენებია, რომ იგი არის შპს “კოლხმშენის” 30% წილის მფლობელი, მეუღლე იზა ხასია კი- ინდივიდუალური მეწარმე, რაც საჯარო დაწესებულებაში ინტერესთა შეუთავსებლობისა და კორუფციის შესახებ კანონის დარღვევაა.
ლევან ქვათაძე – რაჭა-ლეჩხუმისა და ქვემო სვანეთის სახელმწიფო რწმუნებულის ყოფილი მოადგილე
ლევან ქვათაძე ფლობს შპს “პერეირა საქართველოსა” და შპს “SNM GROUP”-ის 50% წილს, ასევე არის შპს “ნობათი 2012”-ის 20% წილის მფლობელი. ეს ინფორმაცია მან ასახა 2020 წელს შევსებულ დეკლარაციაში, თუმცა საჯარო დაწესებულებაში ინტერესთა შეუთავსებლობისა და კორუფციის შესახებ კანონის საწინააღმდეგოდ, წილი დროებით მართვის უფლებით სხვა პირისთვის არ გადაუცია.
გიორგი გონაძე – რაჭა-ლეჩხუმისა და ქვემო სვანეთის სახელმწიფო რწმუნებულის ყოფილი მოადგილე
გიორგი გონაძე ფლობს შპს “რაჭული ღვინო – 97”-ის 10% წილს. მან ეს ინფორმაცია ჩაწერა 2020 წლის იანვარში შევსებულ დეკლარაციაში, თუმცა საჯარო დაწესებულებაში ინტერესთა შეუთავსებლობისა და კორუფციის შესახებ კანონის საწინააღმდეგოდ, წილი დროებით მართვის უფლებით სხვა პირისთვის არ გადაუცია.
ზურაბ ხაჩიძე – სამცხე-ჯავახეთის სახელმწიფო რწმუნებულის მოადგილე
ზურაბ ხაჩიძემ 2020 წლის აგვისტოში შევსებულ დეკლარაციაში არ მიუთითა, რომ მისი მეუღლე ნატალია ჟორდანია არის დირექტორი და ფლობს წილებს შემდეგ კომპანიებში: შპს “ივენთ კომპანი ნან – Event Company NAN” – 50% წილი, დირექტორი და შპს “ტრანსატლანტიკი და პარტნიორები” – 25% წილი, რაც საჯარო დაწესებულებაში ინტერესთა შეუთავსებლობისა და კორუფციის შესახებ კანონის დარღვევაა.
გიორგი შინჯიკაშვილი — ქვემო ქართლში სახელმწიფო რწმუნებულის მოადგილე
გიორგი შინჯიკაშვილმა 2020 წლის მარტში შევსებულ დეკლარაციაში აღნიშნა, რომ არის შპს “იბერია დისთილერის” 5% წილის მფლობელი, თუმცა, მიუხედავად კანონის მოთხოვნისა, საკუთარი წილი მართვის უფლებით სხვა პირისთვის არ გადაუცია.
ნუგზარ სამხარაძე — შიდა ქართლის სახელმწიფო რწმუნებულის მოადგილე
ნუგზარ სამხარაძე შპს “ესდეკას” 35% წილის მფლობელია, მან ეს ინფორმაცია ჩაწერა 2020 წლის მარტში შევსებულ დეკლარაციაში, სადაც ასევე აღნიშნული აქვს წილის მართვის უფლებით გადაცემის შესახებ, თუმცა, კანონის მოთხოვნის მიუხედავად, აღნიშნული წილის მართვის უფლებით სხვა პირისათვის გადაცემის შესახებ ინფორმაცია სამეწარმეო რეესტრში მითითებული არ არის.
[blue_box]ირაკლი ქადაგიშვილი – კახეთის ყოფილი სახელმწიფო რწმუნებული[/blue_box]
ირაკლი ქადაგიშვილი კახეთის სახელმწიფო რწმუნებული იყო 2016-2020 წლებში. ამჟამად იგი საქართველოს პარლამენტის წევრია.
ირაკლი ქადაგიშვილი ფლობს შპს „ჯეოდილის“ 15%-იან წილს. მას ეს კომპანია 2020 წელს დეკლარირებული აქვს, თუმცა საჯარო დაწესებულებაში ინტერესთა შეუთავსებლობისა და კორუფციის შესახებ კანონის საწინააღმდეგოდ, თავისი წილი დროებით მართვის უფლებით სხვა პირისთვის არ გადაუცია.
პლატონ კალმახელიძე — კახეთის სახელმწიფო რწმუნებულის მოადგილე
პლატონ კალმახელიძე ფლობს შპს “დი ბი ეს ჯგუფისა” და შპს “პარტნი-2” 50% წილს. მან ეს ინფორმაცია ჩაწერა 2020 წლის მაისში შევსებულ დეკლარაციაში, თუმცა საჯარო დაწესებულებაში ინტერესთა შეუთავსებლობისა და კორუფციის შესახებ კანონის საწინააღმდეგოდ, წილი დროებით მართვის უფლებით სხვა პირისთვის არ გადაუცია.
“გასათვალისწინებელია, რომ „საერთაშორისო გამჭვირვალობა – საქართველო“ მოკლებულია შესაძლებლობას, შეამოწმოს, არის თუ არა კვლევაში ნახსენები კომპანიები აქტიური, რადგან ამ მიზნისთვის საჭირო ინფორმაცია წარმოადგენს საგადასახადო საიდუმლოებას”,-აცხადებენ TI-ში.
