ნეტგაზეთი | გააუქმებს თუ არა სააპელაციო მელიას პატიმრობას, 25 თებერვალს გახდება ცნობილი გააუქმებს თუ არა სააპელაციო მელიას პატიმრობას, 25 თებერვალს გახდება ცნობილი – Netgazeti
RU | GE  

გააუქმებს თუ არა სააპელაციო მელიას პატიმრობას, 25 თებერვალს გახდება ცნობილი

“ნაციონალური მოძრაობის” თავმჯდომარის, ნიკა მელიას აღკვეთის ღონისძიებასთან დაკავშირებით სააპელაციო სასამართლოს გადაწყვეტილება 25 თებერვალს გახდება ცნობილი.

თბილისის საქალაქო სასამართლომ 17 თებერვალს დააკმაყოფილა პროკურატურის შუამდგომლობა  და “ნაციონალური მოძრობის” ლიდერს გირაოს აღკვეთის ღონისძიება პატიმრობით შეუცვალა. აღნიშნული განჩინება შეიძლება გასაჩივრდეს საქმეზე შემაჯამებელ გადაწყვეტილებასთან ერთად. მიუხედავად ამისა, დაცვის მხარემ მაინც მიიღო გადაწყვეტილება, სააპელაციო სასამართლოსთვის მიემართა.

საჩივრის დასაშვებობასთან დაკავშირებით გადაწყვეტილება სააპელაციო სასამართლოს საგამოძიებო კოლეგიის მოსამართლე გიორგი გოგინაშვილმა უნდა მიიღოს და 72 საათის განმავლობაში განიხილოს. ეს ვადა ხვალ, შუადღეს იწურება.

“საქალაქო სასამართლოს მოსამართლემ ჩაგვიწერა, რომ გადაწყვეტილება საჩივრდება შემაჯამებელთან ერთად, რაც, ჩვენი აზრით, არის არასწორი და ამიტომ მაინც წარვადგინეთ საჩივარი სააპელაციო სასამართლოში.  საერთაშორისო სამართლებრივი პრინციპია, რომ მინიმუმ ორი ინსტანციის სასამართლო მსჯელობდეს კონკრეტული საკითხის კანონიერებაზე. ეს მით უფრო თვალნათელია მაშინ, როდესაც საუბარია პატიმრობაზე.

ჩვენ ვეუბნებით სააპელაციო სასამართლოს, რომ თუ მასაც მიაჩნია, რომ სისხლის სამართლის საპროცესო კოდექსი არ იძლევა  გასაჩივრების შესაძლებლობას, იხელმძღვანელოს კონსტიტუციით — უფრო მაღალი სამართლებრივი ძალის მქონე აქტით. ხოლო თუ ჩათვლის, რომ არ შეუძლია კონსტიტუციის გამოყენება, მაშინ იშუამდგომლოს საკონსტიტუციო სასამართლოში, რომ კონსტიტუციური წარდგინებით მიემართოს საკონსტიტუციო სასამართლოს. შესაბამისად, ეს ნიშნავს ნიკა მელიას სისხლის სამართლებრივი დევნის შეჩერებას”, – განუცხადა “ნეტგაზეთს” ნიკა მელიას ადვოკატმა დიმიტრი საძაგლიშვილმა.

სააპელაციო სასამართლო საჩივრის დასაშვებობის საკითხს მხარეთა დაუსწრებლად განიხილავს. თბილისის სააპელაციო სასამართლოში “ნეტგაზეთს” უთხრეს, რომ საჩივარი განხილვის ეტაპზეა და მოსალოდნელია, რომ გადაწყვეტილება ხვალ გახდება ცნობილი.

ნიკა მელიას კიდევ ერთი ადვოკატი ბექა ბასილაია დარწმუნებულია, რომ მელიას პატიმრობის გადახედვის მოგვარების რესურსი არა იურიდიულ კაზუისტიკაში, არამედ ხელისუფლების ნებაშია.

“შიდა ინსტიტუტებში ნიკა მელიას პატიმრობის გაუქმება შესაძლებელია:

  1. უმოკლესი, კანონით პირდაპირ გათვალისწინებული გზით — პირველი ინსტანციის სასამართლო აუქმებს მის მიერვე მიღებულ გადაწყვეტილებას, საამისოდ საჭიროა მხოლოდ მხარის შუამდგომლობა და ხელისუფლების პოლიტიკური ნება;
  2. მოკლე, კანონის ანალოგიით გასავლელი გზით — სააპელაციო სასამართლო აუქმებს პირველი ინსტანციის სასამართლოს გადაწყვეტილებას, საამისოდ საჭიროა მხარის შუამდგომლობა და ხელისუფლების პოლიტიკური ნება;
  3. გრძელი გზა — საკონსტიტუციო სასამართლოში დავა, რომლის დაკმაყოფილების შემთხვევაში, მე-2 პუნქტში აღწერილი გზა მაინც უნდა გავიაროთ. ცხადია, ხელისუფლების პოლიტიკური ნება ამ შემთხვევაშიც გადამწყვეტია”, – წერს ბასილაია.

ნიკა მელიას საქმეზე არ წყდება კონკრეტულად ერთი ადამიანის თავისუფლების საკითხი; გაჯიუტდება ხელისუფლება და კვლავ ძალის…

Posted by Beka Basilaia on Friday, 19 February 2021

20 ივნისის საქმეზე, ჯგუფური ძალადობის ხელმძღვანელობის და მასში მონაწილეობისთვის ბრალდებულ ნიკა მელიას 2019 წლის 27 ივნისს აღკვეთის ღონისძიების სახით შეეფარდა 30 000-ლარიანი გირაო და დამატებით შემზღუდავი ღონისძიებები: აეკრძალა საცხოვრებელი ადგილის დატოვება საგამოძიებო ორგანოს ინფორმირების და თანხმობის გარეშე, საზოგადოებრივი თავშეყრის ადგილას საჯარო განცხადებებით გამოსვლა და მოწმეებთან ნებისმიერი სახის კომუნიკაცია, დაუწესდა ელექტრონული მონიტორინგი.

2020 წლის პირველი ნოემბრის აქციაზე ნიკა მელიამ ელექტრონული მონიტორინგისთვის განკუთვნილი სამაჯური დემონსტრაციულად მოიხსნა და თქვა, რომ უსამართლობის სიმბოლოს ტარებას აღარ აპირებს. შესაბამისად, მან არ დაიცვა დამატებითი შემზღუდავი ღონისძიება, თუმცა აღკვეთის ღონისძიების სახედ შეფარდებული გირაოს თანხა გადახდილი აქვს.

მელია გირაოს პარალელურად დაწესებულ სხვა დამატებითი შეზღუდვებს მანამდეც არღვევდა, თუმცა პროკურატურა მელიასთვის შეფარდებული აღკვეთის ღონისძიების გამკაცრების შუამდგომლობით სასამართლოში მის მიერ სამაჯურის მოხსნის მერე შევიდა, კერძოდ, მოითხოვა გირაოს გაზრდა 100 000 ლარამდე. თბილისის საქალაქო სასამართლომ, 2020 წლის 3 ნოემბრის განჩინებით, პროკურატურის შუამდგომლობა ნაწილობრივ დააკმაყოფილა და მელიასთვის შეფარდებული გირაოს თანხა 30 000 ლარი 70 000 ლარამდე გაზარდა.

მელიას 50 დღე განესაზღვრა დამატებითი გირაოს გადახდის ვადად, თუმცა თანხის გადახდაზე უარი განაცხადა. პროკურატურამ გირაოს თანხის გადახდისთვის მელიას ჯერ დამატებითი ერთკვირიანი ვადა მისცა, შემდეგ გასაფრთხილებლად პროკურატურაში დაიბარა, 12 თებერვალს კი პარლამენტს მიმართა ბრალდებული დეპუტატისთვის იმუნიტეტის მოსახნელად, რათა გირაოს პატიმრობით შეცვლის შუამდგომლობა დაეყენებინა.

მიმდინარე წლის 17 თებერვალს თბილისის საქალაქო სასამართლომ დააკმაყოფილა პროკურატურის შუამდგომლობა და “ნაციონალური მოძრობის” ლიდერს პატიმრობა შეუფარდა.

ამ თემაზე:

5 გარემოება, რომელიც მელიას დაპატიმრების პოლიტიკურ მოტივზე მიუთითებს

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ჩიჩუა არის "ნეტგაზეთის" რეპორტიორი 2018 წლის სექტემბრიდან.