ნეტგაზეთი | წულუკიანი: ვინც მელიას დაკავებას გმობს, ან არმცოდნე კეთილისმსურველია, ან ანგაჟირებული წულუკიანი: ვინც მელიას დაკავებას გმობს, ან არმცოდნე კეთილისმსურველია, ან ანგაჟირებული – Netgazeti
RU | GE  

წულუკიანი: ვინც მელიას დაკავებას გმობს, ან არმცოდნე კეთილისმსურველია, ან ანგაჟირებული

“ქართული ოცნების” დეპუტატი თეა წულუკიანი ერთადერთ სწორ ნაბიჯს უწოდებს ნიკა მელიას დაკავებაზე სასამართლო გადაწყვეტილების აღსრულებას და აცხადებს, რომ ვინც ოპოზიციის ლიდერის დაკავებას გმობს, ან საქართველოს არმცოდნე კეთილისმსურველია, ან პოლიტიკურად ანაგაჟირებული:

“ის, ვინც ამას გმობს, ან საქართველოს არმცოდნე კეთილისმსურველია, ან პოლიტიკურად ანგაჟირებული და მიკერძოებული გარე პირია, ან კიდევ დაკვეთილ მუსიკაზე აცუნდრუკებული შინაური, მაგრამ არა – ნეიტრალური მრჩეველი და ანალიტიკოსი.

რვა წლის მანძილზე მრავლად მოგვისმენია მსგავსი რჩევა-დარიგებანი: ყოფილი პრეზიდენტის დანაშაულები გვერდზე გადადეთ და არ გაასამართლოთ, მერე რა, რომ ხალხი სამართალს ითხოვს; ყოფილი პრემიერ-მინისტრი არ დააკავოთ, მერე რა, რომ პოსტზე ყოფნისას მრავალი მძიმე დანაშაული ჩაიდინა; არც ყოფილი მინისტრი დააკავოთ, მერე რა, რომ პატიმრების წამება მისი ჰობი იყო; ნაციონალური მოძრაობა არ დაგმოთ, თორემ გვეწყინება, ცუდი რეაქცია გვექნება; აჰ, მაინც დააკავეთ? მოდით, ახლა გაუშვით; და ა.შ.

სწორედ ამგვარი უსამართლო “რჩევები”, დამნაშავე პოლიტიკური ძალის მფარველობა და ზედაპირული განცხადებები ასხამს ოკუპანტის წისქვილზე წყალს და იწვევს დასავლურ ოჯახში ყოფნის მოსურნე ქართველ ხალხში გაოცებას. ასეთი გაოცებანი კი სახიფათოა. თუ არის გასაგები, რასაც ვგულისხმობ, ხომ კარგი. მადლობა პოლიციას მაღალკვალიფიციური ქმედებისათვის” ,- ამბობს წულუკიანი.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.