რიონის ხეობაში, სოფელ ონჭეიშთან, 8 თებერვალს მეწყერი ჩამოწვა, რამაც გზის ჩაკეტვა გამოიწვია. როგორც “ნეტგაზეთს” საავტომობილო გზების დეპარტამენტში განუცხადეს, შესაბამისი ტექნიკა უკვე გზაშია.

“ჩამოსულია მეწყერი, 250-300 მ³ მოცულობის, რამაც გამოიწვია გზის ჩაკეტვა ქუთაისი-ალპანა მამისონის 30-31-ე კილომეტრზე… გაწმენდითი სამუშაოები დაიწყება უახლოეს საათში”, – ამბობენ უწყებაში.

სოფელი ონჭეიში მდებარეობს რიონის ხეობაში, სოფელ ნამოხვანთან ახლოს, სადაც ჰესების კასკადის მშენებლობა იგეგმება. მშენებლობის წინააღმდეგ აქციები რამდენიმე თვეა იმართება. პროტესტის მონაწილეები ფიქრობენ, რომ კასკადი საფრთხეს შეუქმნის ადგილობრივ მოსახლეობასა და ბუნებრივ გარემოს.

“ხედავთ, როგორი ქანებია და ცოტა წვიმების შედეგადაც კი რა შედეგები დგება აქ”, – ამბობს ადგილობრივი მცხოვრები მეწყრის შედეგების ამსახველ ვიდეოში.

ადგილობრივმა აქტივისტმა ნუგზარ გოდოლაძემ “ნეტგაზეთს” უთხრა, რომ მეწყერი სოფლებს – ონჭეიშსა და მოლეკურას- შორის 15:00-დან 16:00-მდე დროის მონაკვეთში ჩამოწვა. მისივე თქმით, მსგავსი შემთხვევა, თუმცა ნაკლებად მასშტაბური, მოხდა სოფელ მექვენასთანაც.

სეისმური მონიტორინგის ცენტრის ხელმძღვანელის, თეა გოდოლაძის თქმით, მომხდარი კიდევ ერთხელ ადასტურებს ჰესების კასკადის აშენების თანმდევი საფრთხეების სერიოზულობას.

“ეს არის მთლიანად დატბორვის არეალი, სადაც დაგეგმილია მშენებლობა. ზუსტად ამ პრობლემებზე ვამახვილებთ ყურადღებას. კომპანიამ არ იცის, რა ტერიტორიაზე შედის და რა ტერიტორიას ტბორავს.

ეს არის უკიდურესად საშიში მეწყრული უბნები, რომელთა გააქტიურებასაც, როგორც ხედავთ, სულაც არ სჭირდება დამატებითი წყალსაცავის აშენება. ეს ისედაც მეწყრული უბნებია. დამატებით წყალსაცავი კიდევ უფრო დაამძიმებს სურათს, რაც შეიძლება, კატასტროფულად დამთავრდეს რიონის ხეობის მოსახლეობისათვის”, – უთხრა მან “ტვ პირველს”.

მეწყერთან დაკავშირებით განცხადება გაავრცელა ნამახვანჰესის მშენებელმა კომპანია ENKA-მაც, რომელმაც აღნიშნა, რომ “ამ მომენტისთვის კონკრეტულ საპროექტო მონაკვეთში კომპანიის მიერ სამუშაოები არ ხორციელდება”.