11 ნოემბერს, საინფორმაციო სააგენტო “ინტერპრესსნიუსმა” გაავრცელა ინფორმაცია, რომ წულუკიანი საპარლამენტო პოსტის დაკავების ნაცვლად, აღმასრულებელ ხელისუფლებაში დაბრუნდება და პრემიერ-მინისტრის პოსტს დაიკავებს.
იუსტიციის ყოფილი მინისტრი თეა წულუკიანი, რომელიც “ქართული ოცნების“ საპარლამენტო სიის მეოთხე ნომერია, აცხადებს, რომ ჭორია ინფორმაცია მისი შესაძლო გაპრემიერების შესახებ. აღნიშნულზე მან “იმედის” ეთერში ისაუბრა.
“ეს არის ჭორი, წერტილი – როგორც იტყოდა ამჟამინდელი და მომავალი პრემიერ-მინისტრი, ბატონი გახარია. ჩვენ ვთქვით, რომ ჩვენი პრემიერი იყო გახარია, როდესაც კანდიდატს კი არ ვასახელებდით, არამედ ვასახელებდით პრემიერს, როდესაც 20-ეულის წარდგენა მოხდა.
რა თქმა უნდა, მე როგორც აქამდე ვიყავი “ქართული ოცნების” და მისი გუნდის რიგითი წევრი და მებრძოლი იმ ღირებულებებისთვის, რითაც პირველ ოქტომბერს მოვედით ხელისუფლებაში, ასეთად დავრჩები პარლამენტში”, – ამბობს ის.
