მთიან ყარაბაღში დღეს გახსნილი ცეცხლის შემდეგ საომარი მდგომარეობა გამოცხადდა. პარალელურად, სომხეთის მთავრობა ამბობს, რომ შეტაკებებს მსხვერპლი უკვე მოჰყვა.

როგორც ყარაბაღის დე ფაქტო ლიდერი, არაიკ არუთუნიანი აცხადებს, ყარაბაღში “არსებული სიტუაციის გათვალისწინებით, მე საომარი მდგომარეობა და 18 წელს ზემოთ ყველა კაცის მობილიზაცია გამოვაცხადე”.

ამავე განცხადებაში მან დასძინა, რომ ყარაბაღს ომი არ უნდა, თუმცა “ჩვენ ვალდებული ვართ ჩვენი ოჯახები და სამშობლო დავიცვათ”.

რაც შეეხება მსხვერპლს, სომხეთის თავდაცვის მინისტრის პრესსპიკერი ფეისბუკზე წერს, რომ ამ ეტაპისთვის ინფორმაცია 2 დაღუპულ ადამიანზე ვრცელდება, მათ შორის ერთი არასრულწლოვანია. ამასთანავე, არიან დაშავებულებიც.

“მტერმა არწახის მიმართულებით იერიში მიიტანა”, – წერს ფეისბუკზე სომხეთის პრემიერ- მინისტრი ნიკოლ ფაშინიანი დღეს, 27 სექტემბერს.

რაც შეეხება ბაქოს პოზიციას აღნიშნულ ფაქტთან დაკავშირებით, აზერბაიჯანის სახელისუფლებო პრესის ინფორმაციით, “სომხეთის შეიარღებულმა ძალებმა ფართომასშტაბიანი პროვოკაცია მოაწყვეს და აზერბაიჯანული პოზიციები და მიმდებარე დასახლებულ პუნქტები დაცხრილეს, რის შედეგადაც არიან დაღუპულები და დაჭრილები, მათ შორის მშვიდობიანი მოქალაქეები”.

სომხეთსა და აზერბაიჯანს შორის, ბოლო დროის ყველაზე მასშტაბური რამდენიმედღიანი შეტაკებები 12 ივლისს სომხეთ-აზერბაიჯანის საზღვარზე, ტავუშის/თოუზის პროვინციაში დაიწყო. შეტაკებების შედეგად ორივე მხარეს იყო მსხვერპლი, მათ შორის, აზერბაიჯანელი სამხედრო მაღალჩინოსნები.

ორივე მხარემ ერთმანეთი დაადანაშაულა შეტაკებების დაწყებაში. აზერბაიჯანელი პოლიტოლოგები და ექსპერტები მიიჩნევენ, რომ ივლისის შეტაკებები საზღვარზე ბაქოს ინტერესებში ნაკლებად შედიოდა, ვინაიდან ბაქოსთვის მომგებიანი არ არის კონფლიქტის ზონის გადატანა ყარაბაღიდან სომხეთ-აზერბაიჯანის საზღვარზე. ამჯერად დაპირისპირება უშუალოდ ყარაბაღის კონფლიქტის ზონაშია.

სამხრეთ კავკასიის ამ ორ ქვეყანას შორის მთიანი ყარაბაღის კონფლიქტი 1988 წელს დაიწყო. აზერბაიჯანი მიიჩნევს, რომ მთიანი ყარაბაღი და შვიდი მიმდებარე რაიონი, — აზერბაიჯანის 20%, — სომხეთის შეიარაღებული ძალების ოკუპაციაშია, რასაც კატეგორიულად უარყოფს სომხეთი.