ნეტგაზეთი | აშშ-ში TikTok-სა და WeChat-ს ვეღარ გადმოწერენ აშშ-ში TikTok-სა და WeChat-ს ვეღარ გადმოწერენ – Netgazeti
RU | GE  

აშშ-ში TikTok-სა და WeChat-ს ვეღარ გადმოწერენ

დონალდ ტრამპის ადმინისტრაციის გადაწყვეტილებით, 20 სექტემბრიდან აშშ-ის მოსახლეობა აპლიკაციების – TikTok-სა და WeChat-ის სმარტფონებში გადმოწერას ვეღარ შეძლებს. ამის შესახებ ნათქვამია აშშ-ის სავაჭრო დეპარტამენტის პრესრელიზში.

აშშ-ის ხელისუფლებას ჩინური აპლიკაციები უსაფრთხოების კუთხით პრობლემურად მიაჩნია.

“ჩინეთის კომუნისტურმა პარტიამ” აჩვენა მოტივები, რომ აღნიშნული აპლიკაციების გამოყენებით აშშ-ის ეროვნულ უსაფრთხოებას, საგარეო პოლიტიკასა და ეკონომიკას შეუქმნას საფრთხე”, – წერს სავაჭრო დეპარტამენტის მდივანი პრესრელიზში.

დოკუმენტის თანახმად, ორივე აპლიკაცია საფრთხის შემცველია მომხმარებელთა პირადი მონაცემების “უდიდესი ნაწილის” შეგროვებისა და ჩინეთის მმართველი პარტიის სადაზვერვო სამსახურებთან თანამშრომლობის ფონზე.

Forbse-ის თანახმად, სმარტფონების მომხმარებლები აპლიკაციებს 20 სექტემბრიდან ვეღარ გადმოიწერენ, უშუალოდ WeChat-ის მომხმარებლებს კი ასევე შეეზღუდებათ აპლიკაციის ფინანსური ტრანზაქციების მიზნით გამოყენების უფლება.

Financial Times-ის მიხედვით, აშშ-ში TikTok-ის მოხმარება გარკვეული ხნის განმავლობაში კვლავ შეეძლებათ იმ ადამიანებს, რომლებსაც აპლიკაცია უკვე გადმოწერილი აქვთ. თუმცა, ეს ტენდენციაც ნელ-ნელა დაიკლებს, ვინაიდან მომხმარებლებს პროგრამის განახლების საშუალება აღარ ექნებათ.

ჯერჯერობით აღნიშნული აპლიკაციების ბედი აშშ-ში საბოლოოდ გადაწყვეტილი არ არის, რადგან მათ მილიონობით ამერიკელი იყენებს. მომხმარებელთა ნაწილი და თავად კომპანია ტრამპის ხელისუფლების გადაწყვეტილების გასაჩივრებას აპირებს.

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან