საკარანტინო ვადის 8 დღემდე შემცირება უცხოეთიდან შემოსულ პირებს შეეხება, დადასტურებულ შემთხვევებთან კონტაქტებს კი კვლავ 12 დღიანი კარანტინის გავლა მოუწევთ. აღნიშნულის შესახებ “ნეტგაზეთს” დაავადებათა კონტროლის ცენტრის ხელმძღვანელის მოადგილემ პაატა იმნაძემ განუცხადა.
მისი თქმით, COVID დადასტურებულ შემთხვევებთან კონტაქტებში ვირუსის გადადების რისკი გაცილებით მაღალია, რის გამოც აღნიშნული ცვლილება ამ ეტაპზე მხოლოდ უცხოეთიდან შემოსულ პირებს შეეხება. რაც შეეხება უცხოეთიდან შემოსული პირებისთვის საკარანტინო ვადების შემცირებას, იმნაძე განმარტავს, რომ სამეცნიერო მტკიცებულებები ამ ნაბიჯის გადადგმის შესაძლებლობას იძლევა:
“დაგროვდა სამეცნიერო მტკიცებულებები, სხვადასხვა ქვეყნის გამოცდილება, რისკის შეფასება. შემთხვევის კონტაქტს ჯერ [საკარანტინო ვადის 8 დღემდე შემცირება] არ ეხება. იქ რისკი გაცილებით მაღალია”, – უთხრა იმნაძემ “ნეტგაზეთს”.
