ჩაქვში, სასტუმრო “ოაზისში” მყოფ ყველა სტუმარსა და პერსონალს კორონავირუსზე ტესტირება ჩაუტარდა. ამის შესახებ “ნეტგაზეთს” აჭარის ჯანდაცვის სამინისტროში განუცხადეს. მათივე ცნობით, კვლევისთვის 900-ზე მეტი სინჯია აღებული.
როგორც სასტუმრო “ოაზისის” მენეჯერმა, გვანცა ხაინდრავამ ჟურნალისტებს განუცხადა, ტესტების პასუხები დღეს, შუადღეს, ეცოდინებათ.
“ამ ეტაპისთვის [სასტუმროს] ტერიტორია ისევ ჩაკეტილია, სტუმრებს შიდა ტერიტორიაზე შეუძლიათ, რომ იმოძრაონ. ტესტირების პასუხები დაახლოებით დღის 2-3 საათისთვის იქნება. ყველა თანამშრომელსა და სტუმარს ჩაუტარდა ტესტირება. როგორც კი გვეცოდინება პასუხები, იმის მიხედვით ვიმოქმედებთ.
სასტუმრო “ოაზისში”, სადაც კორონავირუსი ერთ-ერთ სტუმარს დაუდასტურდა, 400-მდე ექიმი კონფერენციაზე იმყოფებოდა. კონფერენციის მონაწილეს კორონავირუსი 2 სექტემბერს დაუდასტურდა.