ბერლინის კინოფესტივალის გადაწყვეტილებით, საუკეთესო ქალი და საუკეთესო კაცი მსახიობის ნომინაციები 2021 წლიდან უქმდება. მათ სანაცვლოდ კი გენდერულად ნეიტრალური ნომინაციები დაწესდება.
2021 წელს კინოფესტივალი არა დისტანციურად, არამედ სპეციალურად შერჩეულ ადგილას გაიმართება.
კინოფესტივალი გავრცელებულ განცხადებაში წერს, რომ პირველად ბერლინალეს ისტორიაში პრიზები გენდერულად ნეიტრალური ნომინაციებით გაიცემა. საუკეთესო ქალი და კაცი მსახიობის ნაცვლად კი პრიზები „ვერცხლის დათვი მთავარი როლის საუკეთესო შესრულებისთვის“ და „ვერცლის დათვი დამხმარე როლის საუკეთესო შესრულებისთვის“ ნომინაციებში გაიცემა.
კინოფესტივალის დირექტორის თქმით, მათ სჯერათ, რომ ეს გადაწყვეტილება დაეხმარება კინოინდუსტრიას, გენდერულად უფრო მეტად სენსიტიური გახდეს.
ბერლინალეს ფარგლებში საერთაშორისო ჟიური შემდეგ 8 პრიზს გასცემს:
- ოქროს დათვი საუკეთესო ფილმისთვის
- ვერცხლის დათვი – ჟიურის გრან პრი
- ვერცხლის დათვი საუკეთესო რეჟისურისთვის
- ვერცხლის დათვი – ჟიურზის პრიზი
- ვერცხლის დათვი მთავარი როლის საუკეთესო შესრულებისთვის
- ვერცხლის დათვი დამხმარე როლის საუკეთესო შესრულებისთვის
- ვერცხლის დათვი საუკეთესო სცენარისთვის
- ვერცხლის დათვი გამორჩეული შემოქმედებითი მიღწევისთვის
