2020 წლის საპარლამენტო არჩევნები ოქტომბრის ბოლოს უნდა გაიმართოს. ოპოზიციური პარტიები, რომლებიც “ლეიბორისტული პარტიის” ოფისში მიმდინარე კონსულტაციებში მონაწილეობდნენ, თბილისის 6 მაჟორიტარულ ოლქში საერთო კანდიდატი დაასახელეს, მათ შორის:
- ელენე ხოშტარია – ვაკე
- ნიკა მელია – გლდანი
- გიორგი ვაშაძე – ისანი
- ლევან ხაბეიშვილი – სამგორი
- შალვა შავგულიძე – მთაწმინდა/კრწანისი.
ამ დრომდე ღია რჩება დიდუბე/ჩუღურეთისა და საბურთალოს მაჟორიტარული ოლქები. დღეს, 10 აგვისტოს საკუთარი კანდიდატურა დიდუბე/ჩუღურეთის მაჟორიტარად “გირჩის” ლიდერმა ზურა ჯაფარიძემ დაასახელა. ჯაფარიძე ამბობს, რომ კონსულტაცია ჰქონდა რამდენიმე ოპოზიციური პარტიის ლიდერთან, რომლებმაც დაუდასტურეს საკუთარი კეთილგანწყობა:
“იმედი მაქვს, ეს კეთილგანწყობა გადაითარგმნება პოლიტიკურ მხარდაჭერაში ოპოზიციური პარტიების მხრიდან”, – აცხადებს ჯაფარიძე.
რაც შეეხება საბურთალოს, უკვე ცნობილია, რომ ამ ოლქში მაჟორიტარულ არჩევნებში კენჭს იყრიან პარტია “მოქალაქეების” დამფუძნებელი ალეკო ელისაშვილი, “ქართული ოცნებიდან”- ყოფილი ჯანდაცვის მინისტრი დავით სერგეენკო, პოლიტიკური გაერთიანება”ლელოდან”- ბადრი ჯაფარიძე და პარტიის “კანონი და სამართალი” დამფუძნებელი – თაკო ჩარკვიანი.
