ნეტგაზეთი | პირი, რომელიც მოხმარებისთვის გამოსადეგ ოდენობაზე ნაკლები ნარკოტიკით დააკავეს, სააპელაციომ გაათავისუფლა პირი, რომელიც მოხმარებისთვის გამოსადეგ ოდენობაზე ნაკლები ნარკოტიკით დააკავეს, სააპელაციომ გაათავისუფლა – Netgazeti
RU | GE  

პირი, რომელიც მოხმარებისთვის გამოსადეგ ოდენობაზე ნაკლები ნარკოტიკით დააკავეს, სააპელაციომ გაათავისუფლა

„საქართველოს დემოკრატიული ინიციატივის (GDI) ინფორმაციით, თბილისის სააეპაცლიო სასამართლომ დააკმაყოფილა მათი შუამდგომლობა იმ პირის საქმეზე, რომელიც 0.000417 გრამი ნარკოტიკით დააკავეს.

GDI-ის ცნობით, სასამართლომ მსჯავრდებულისთვის სასჯელის სახედ და ზომად დანიშნული 6 წლით თავისუფლების აღკვეთა სრულად გააუქმა და დარბაზიდან გაათავისუფლა.

„მსჯავრდებული 2018 წლის განაჩენით სასჯელს იხდიდა ნარკოტიკული დანაშაულისთვის, კერძოდ, ნარკოტიკული საშუალება მეთადონის, წონით – 0.000417 გრამი, ამფეტამინის, წონით – 0.002109 გრამის და მეტამფეტამინის, წონით- 0.0002202 გრამის, უკანონო შეძენისა და შენახვისთვის.

სასამართლომ გაიზიარა დაცვის მხარის და ექსპერტის პოზიცია, რომ ნარკოტიკული საშუალებების აღნიშნული ოდენობები არ მიეკუთვნებოდა მოხმარებისთვის გამოსადეგ ოდენობას, ხოლო პატიმრობის გამოყენება წარმოადგენდა არაადამიანური და დამამცირებელი სასჯელის გამოყენებას“, – წერს GDI.

ორგანიზაცია წერს, რომ ამ გადაწყვეტილებას საფუძვლად ედო საკონსტიტუციო სასამართლოს 4 ივნისის განჩინება, კერძოდ:

საქართველოს საკონსტიტუციო სასამართლომ 2020 წლის 4 ივნისის განჩინებით, არაადამიანური და დამამცირებელი სასჯელის გამოყენებად მიიჩნია და არაკონსტიტუციურად ცნო სისხლის სამართლის კოდექსის 260-ე მუხლის მესამე ნაწილის შინაარსი, რომელიც პატიმრობის გამოყენებას ითვალისწინებდა მოხმარებისთვის გამოუსადეგარი ოდენობით ნარკოტიკულ საშუალებათა უკანონო შეძენისა და შენახვისთვის.

„აღსანიშნავია, რომ წინამდებარე საქმეზე სააპელაციო სასამართლომ 260-ე მუხლის მესამე ნაწილის არაკონსტიტუციურად ცნობილი შინაარსი ასევე ამოიკითხა ამავე მუხლის პირველ ნაწილში. სასამართლომ, მიუხედავად იმისა, რომ საკონსტიტუციო სასამართლოს განჩინება ვერბალურად მხოლოდ 260-ე მუხლის მესამე ნაწილს ეხება, გაიზიარა დაცვის პოზიცია, რომ ნორმის შინაარსის არაკონსტიტუციურად ცნობა ყველა სხვა ნორმას აცლის ამავე შინაარსს, მიუხედავად იმისა, კონკრეტულ საქმეში საკონსტიტუციო სასამართლო სხვა ნორმათა შინაარსის კონსტიტუციურობაზე მსჯელობს თუ არა“, – ამბობს GDI.

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ბიძინაშვილი არის რეპორტიორი 2017 წლის 25 სექტემბრიდან