კორონავირუსის ვაქცინა რომ არსებობდეს, საქართველოს მოსახლეობის 46% არ აიცრებოდა. ამის შესახებ ნათქვამია “ეროვნულ-დემოკრატიული ინსტიტუტის”(NDI) დაკვეთით ივნისში ჩატარებულ კვლევაში, რომელიც საქართველოში საზოგადოების განწყობებს ასახავს.
კვლევის თანახმად, მოქალაქეთა 38% ამბობს, რომ აიცრება, 15%-ს კი კითხვაზე პასუხი არ აქვს.
ფოკუს-ჯგუფების მონაწილეთა ნაწილის მოსაზრებები ასეთია:
- “ყველაფერი დამოკიდებულია ვაქცინის ხარისხზე, მის წარმომავლობაზე”;
- “თუ პანდემია შენელდება, მაშინ ვაქცინის საჭიროება აღარ იქნება”;
- “აცრა სავალდებულო თუ არ იქნება, ხალხი თავს შეიკავებს”;
- “მოვიცდი და დავაკვირდები. ისეთი ვაქცინით აცრის მეშინია, რომელიც ახალია და დიდი ხანი არ არსებობს”.
კვლევა NDI-ის დაკვეთით CRRC-საქართველომ ჩაატარა. საველე სამუშაოები 26-30 ივნისს, სატელეფონო გამოკითხვის მეთოდით ჩაატარეს. ჯამში, 1 550 დასრულებული ინტერვიუ შედგა. საშუალო ცდომილების ზღვარი 2%-ია.