ნეტგაზეთი | „ქართულმა მარშმა“ პარტია დააფუძნა „ქართულმა მარშმა“ პარტია დააფუძნა – Netgazeti

„ქართულმა მარშმა“ პარტია დააფუძნა

ულტრანაციონალისტურმა მოძრაობამ „ქართულმა მარშმა“ დღეს საგურამოში პარტია დააფუძნა.

ამისთვის დღეს, 2 ივლისს, საგურამოში, ილია ჭავჭავაძის სახლ-მუზეუმის ეზოში სადამფუძნებლო ყრილობა გაიმართა. „ქართული მარშის“ ინფორმაციით, პარტია ორი მოძრაობის გაერთიანების საფუძველზე შეიქმნა – „ქართული მარშისა“ და „გეორგიას“.

პარტიას ამიერიდან ჰქვია „ქართული მარში – ეროვნული მოძრაობა“.

„იმის ილუზია ჩვენ არ გვაქვს, რომ პარლამენტში უმრავლესობით მოვალთ, მაგრამ პროგრამა მინიმუმი არის ფრაქცია პარლამენტში,“- თქვა დღეს ჟურნალისტებთან სანდრო ბრეგაძემ და დაამატა, რომ პარლამენტში არის რამდენიმე ჯგუფი, რომელთანაც თანამშრომლობა შეიძლება.

ჟურნალისტების კითხვაზე, თუ რატომ აირჩიეს ყრილობის ადგილად ჭავჭავაძის სახლ-მუზეუმი, ბრეგაძე ამბობს, რომ მისი პარტია ჭავჭავაძის იდეებს იზიარებს. მისივე ინფორმაციით, ღონისძიება პარტიას 3 ათასი ლარი დაუჯდა.

„ქართული მარშის“ მიერ პარტიის დაფუძნებას დღეს გამოეხმაურა „ევროპული საქართველო“. მისი წევრის, გიორგი კანდელაკის თქმით, მიუღებელია, რომ ჭავჭავაძის სახლ-მუზეუმის ტერიტორია „ექსტრემისტულ, პრორუსულ და ქართულ ოცნებასთან აფილირებულ ძალადობრივ ჯგუფს“ დაეთმო.

რაც შეეხება თავად სახლ-მუზეუმის ადმინისტრაციას, „ტელეკომპანია პირველთან“ მისი ადმინისტრაციის წარმომადგენელი ამბობს, რომ სხვების მსგავსად, მათ შორის, „ქართულ მარშსაც“ ჰქონდა ამ ადგილის დაქირავების უფლება.

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ბიძინაშვილი არის რეპორტიორი 2017 წლის 25 სექტემბრიდან