ნეტგაზეთი | შაქარაშვილის საქმეს ძალადობის მუხლი დაემატა შაქარაშვილის საქმეს ძალადობის მუხლი დაემატა – Netgazeti

შაქარაშვილის საქმეს ძალადობის მუხლი დაემატა

შს მინისტრის მოადგილის, ვლადიმერ ბორცვაძის განცხადებით, გიორგი შაქარაშვილის საქმეზე თავისუფლების უკანონო აღკვეთის მუხლს ძალადობის მუხლიც დაემატა, შესაბამისად, ამ ეტაპზე გამოძიება სისხლის სამართლის ორი მუხლით მიმდინარეობს. ამის მიზეზად ბორცვაძე გამოძიებისისას აღმოჩენილ გარემოებას ასახელებს. შსს-ს ცნობით, გარკვეულ პირებს შორის დაპირისპირება მოხდა, რომელშიც თავად გიორგი შაქარაშვილის მონაწილეობა ამ ეტაპზე არ დასტურდება:

“გამოძიება პირველ ეტაპზე დაიწყო თავისუფლების უკანონო აღკვეთის ფაქტზე, რადგან შეტყობინება გვქონდა გიორგი შაქარაშვილის გაუჩინარებასთან დაკავშირებით. მას შემდეგ, რაც ჩატარდა საგამოძიებო მოქმედებები  და ფიზიკური დაპირისპირების ფაქტი გამოიკვეთა, ამ კვალიფიკაციას კიდევ ერთი მუხლი დაემატა. შესაბამისად, დღეის მდგომარეობით საქმეზე გამოძიება თავისუფლების უკანონო აღკვეთისა და ძალადობის მუხლებით მიმდინარეობს.”

სამინისტროს ინფორმაციით, 18 ივნისს საღამოს გიორგი შაქარაშვილი სოფელ ნარეკვავის დასახლებაში სტუმრად იმყოფებოდა, სადაც ცალკეულ პირთა შორის სიტყვიერი და ფიზიკური დაპირისპირება მოხდა. შსს-ს ცნობით, ამ პერიოდისთვის გიორგი შაქარაშვილის მონაწილეობა კონფლიქტში არ დასტურდება.

მათივე ცნობით, მოგვიანებით კონფლიქტი მდინარე არაგვზე მდებარე ხიდის სიახლოვეს გაგრძელდა. ამის შემდეგ შაქარაშვილის კვალი დაიკარგა და 4- დღიანი ძებნის შემდეგ მისი ცხედარი გუშინ მდინარის კალაპოტში იპოვეს.

“19 ივნისს შინაგან საქმეთა სამინისტროს მცხეთა-მთიანეთის პოლიციის დეპარტამენტში შემოვიდა შეტყობინება გიორგი შაქარაშვილის გაუჩინარების შესახებ, რის საფუძველზეც დაიწყო გამოძიება გიორგი შაქარაშვილის თავისუფლების უკანონოდ აღკვეთის ფაქტზე.

ჩატარებული ოპერატიულ-სამძებრო და საგამოძიებო მოქმედებების შედეგად ამ ეტაპზე ირკვევა, რომ 2020 წლის 18 ივნისს, საღამოს გიორგი შაქარაშვილი მცხეთის რაიონის სოფელ ნარეკვავის დასახლებაში სტუმრად იმყოფებოდა მეგობრის მიერ ნაქირავებ სახლში, სადაც ცალკეულ პირთა შორის ურთიერთშელაპარაკების ნიადაგზე სიტყვიერი და ფიზიკური დაპირისპირება მოხდა. მოგვიანებით, დასახელებული კონფლიქტი გაგრძელდა თბილისი-სენაკი-ლესელიძის საავტომობილო გზაზე, მდინარე არაგვზე მდებარე ხიდის სიახლოვეს”,-აცხადებენ შსს-ში.
უწყების ინფორმაციითვე, დღეის მდგომარეობით, ამ საქმეზე გამოკითხულია ათეულობით პირი, დაახლოებით 50 მოწმე, ასევე ჩატარებულია სხვადასხვა საგამოძიებო მოქმედება: საცხოვრებელი სახლების ჩხრეკა, ამოღებულია კონფლიქტში მონაწილე და შემსწრე პირთა ტანსაცმელი, ავტომანქანები, მობილური ტელეფონები და სხვა.
თავად გარდაცვლილის ოჯახი აცხადებს, რომ გამოძიების პარალელურად, საქმეში დამოუკიდებელ ექსპერტსაც ჩართავს.
ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.