პოპულარული სომხურენოვანი ვებ-გვერდი medmedia.am, რომელიც კორონავირუსს “ფეიკ-პანდემიად” წარმოაჩენს და ამავე დროს, კორონავირუსის პოტენციურ ვაქცინებს “ბიოლოგიურ ირაღად” მოიხსენიებს, აშშ-ს გადამხდელთა ფულით დაფინანსდა, – ჟურნალისტური გამოძიების შედეგებს დამოუკიდებელი გლობალური მედია ორგანიზაცია openDemocracy.net ავრცელებს.
როგორც openDemocracy-ის სტატიაში წერია, ვებ-გვერდი 2019 წელს სომხეთში აშშ-ს საელჩოს “დემოკრატიის ხელშემწყობი” მცირე გრანტების პროგრამის ფარგლებში, არასამთავრობო ორგანიზაცია “სომხეთის ახალგაზრდა ექიმების ასოციაციის” (AAYD) მიერ შეიქმნა.
ვებ-გვერდს, დღეში საშუალოდ 100 ათასზე მეტი ვიზიტორი ჰყავს, ყოველდღიურ ოფიციალურ ახალ ამბებთან და განცხადებებთან ერთად, ვებ-გვერდზე განთავსებულია ისეთი ტიპის მასალები, სადაც მოუწოდებენ მკითხველს, უარი თქვან კორონავირუსის პოტენციურ ვაქცინაციაზე – აღნიშნულ სტატიას 131 ათასზე მეტი ვიზიტორი ჰყავდა. ამასთან, ვებ-გვერდის ცალკეული მასალები, განსაკუთრებით, აქტიურად ვრცელდება ფეისბუკით.
openDemocracy ყურადღებას ამახვილებს ასევე ვებ-გვერდის ინფორმაციაზე, თითქოს სომხეთში გარდაცვლილი პაციენტის ახლობლებს 200 აშშ დოლარს სთავაზობენ იმისთვის, რომ პაციენტი კორონავირუსით გარდაცვლილად გამოაცხადონ.
“აშშ-ს საელჩო სომხეთში ადასტურებს, რომ გრანტების პროგრამის ფარგლებში ნამდვილად დაფინანსდა აღნიშნული ვებ-გვერდი, თუმცა, არ ასახელებს გრანტის ოდენობას და არც ვებ-გვერდის მიერ გავრცელებულ დეზინფორმაციაზე აკეთებს კომენტარს”, – ვკითხულობთ საგამოძიებო სტატიაში.
გარდა ამისა, როგორც ირკვევა, ვებ-გვერდის შემქმნელმა აღნიშნულმა არასამთავრობო ორგანიზაციამ 10 ათასი აშშ დოლარის ოდენობის გრანტი ევროკავშირიდანაც მიიღო.
სტატიაში წერია, რომ ვებ-გვერდი medmedia.am დაფუძნებულია ექიმ გევორგ გრიგორიანის მიერ, რომელიც იქამდე ჰომოფობიური გამონათქვამებითაც იყო ცნობილი, მაგალითად, ისეთი გამონათქვამებით, როგორიცაა “ყველა გეი უნდა დაწვა”.