დაავადებათა კონტროლის ეროვნული ცენტრის დირექტორის მოადგილე, პაატა იმნაძე ამბობს, რომ ე.წ. საყოფაცხოვრებო კონდიციონერების გამოყენება კორონავირუსის გავრცელების რისკის კუთხით საშიშია.

იმნაძე განმარტავს, რომ თუ კონდიციონერი დახურულ სივრცეში არსებულ ჰაერს „ატრიალებს“ – ეს ვირუსის გავრცელების რისკს ზრდის.

„ის კონდიციონერები, რომლებიც ჩვენთან გამოიყენება, ე.წ. საყოფაცხოვრებო კონდიციონერები, რომლებიც ჰაერს შიგნით ატრიალებენ – სამწუხაროდ, მათი გამოყენება ჯერჯერობით არსებული ყველა მონაცემით არის მაღალი რისკის შემცველი.

თუ არ მუშაობს კონდიციონერი გარედან ჰაერის შემოტანაზე, რომელიც გრილდება და თუ მას არ აქვს სისტემები, რომლებსაც გარეთ გააქვს ჰაერი … ასეთი არ არის აბსოლუტური უმრავლესობა იმ კონდიციონერებისა, რომელსაც საყოფაცხოვრებო კონფიციონერები ჰქვია – მათი გამოყენება საშიშია“, – ამბობს იმნაძე.

მისივე განმარტებით, არსებობს კონდიცირების სხვა სისტემებიც, ისეთი, როგორიც თვითმფრინავებში და ლაბორატორიებშია. იმნაძე ყვება, რომ ასეთ სისტემებს ე.წ. ჰეპაფილტრები აქვს – ფილტრები, რომლებიც ვირუსებს აკავებს.

ჩვეულებრივ კონდიციონერებში კი მტვრის დასაჭერი ფილტრებია, რომლებიც ვირუსებს ვერ აჩერებენ.