ჩოხატაურის მუნიციპალიტეტში ახალგაზრდა კაცი მოკლეს. შემთხვევა დღეს, 21 მაისს მოხდა.
როგორც “ნეტგაზეთს” საქართველოს შინაგან საქმეთა სამინისტროში განუცხადეს, მომხდარზე გამოძიება საქართველოს სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს.
უწყებაში “ნეტგაზეთს” ასევე განუცხადეს, რომ პოლიციამ განზრახ მკვლელობის საქმეზე ერთი პირი უკვე დააკავა:
“გამოძიებით დადგინდა, რომ მიმდინარე წლის 21 მაისს ჩოხატაურის მუნიციპალიტეტის სოფელ გუთურში, ურთიერთშელაპარაკებისას,ბრალდებულმა შ.ჯ-მ თავის ნაცნობს – 1993 წელს დაბადებულ ა.კ.-ს, მისსავე საცხოვრებელ სახლში სანადირო თოფიდან
გასროლით სხეულზე ჭრილობები მიაყენა და შემთხვევის ადგილიდან მიიმალა. დაჭრილი მამაკაცი შემთხვევის ადგილზე გარდაიცვალა”, – აცხადებენ უწყებაში.
ბრალი დამტკიცების შემთხვევაში 7-დან 15 წლამდე ვადით თავისუფლების აღკვეთას ითვალისწინებს.