ახალი ამბები

“ათენის რეისის ბილეთების გაყიდვა დროებით შეწყდა ტექნიკური მიზეზების გამო” – ჯორჯიან ეარვეისი

5 აპრილი, 2020 • 1090
“ათენის რეისის ბილეთების გაყიდვა დროებით შეწყდა ტექნიკური მიზეზების გამო” – ჯორჯიან ეარვეისი

“ჯორჯიან ეარივეისის” ინფორმაციით, დღეს დილით მომხმარებელთა მაღალი ნაკადის გამო მათი ვებგვერდი გადაიტვირთა და ამიტომ  7 აპრილისთვის დაგეგმილი თბილისი-ათენი-თბილისის რეისზე ბილეთების რეალიზაცია ჯერ ვერ განხორციელდა.

კომპანიის ცნობით, “ამჟამად მიმდინარეობს ტექნიკური სამუშაოები ხარვეზის აღმოსაფხვრელად, რის შემდეგაც განახლდება ეტაპობრივად ბილეთების რეალიზაციის პროცესი”.

“როგორც მოგეხსენებათ 2020 წლის 7 აპრილს დაგეგმილია რეისი თბილისი-ათენი-თბილისი, აღნიშნული რეისს კომპანია ახორციელებს საქართველოს მთავრობასთან შეთანხმებით, მსოფლიოში კორონავირუსის გავრცელების ფონზე უცხოეთში მყოფი საქართველოს მოქალაქეების საქართველოში დაბრუნების პროცესის ფარგლებში.
დადგენილი წესის თანახმად, მთავრობასთან შეთანხმებულ რეისებზე ბილეთების რეალიზაცია ხორციელდება რეისის თარიღამდე ორი დღით ადრე, კომპანიის ვებ-გვერდის მეშვეობით.

მიმდინარე წლის 5 აპრილს, კომპანიამ, თბილისის დროით დილის 10:00 საათიდან დაიწყო ბილეთების ეტაპობრივი გამოტანა ონლაინ პლატფორმაზე. როგორც კომპანიის ტექნიკური პლატფორმის მონაცემები აჩვენებს, 10:02 წუთზე სისტემამ რეალიზაციისთვის გამოიტანა 10 ბილეთი, მოცემულ მომენტში საიტზე ერთდროულად შემოსული იყო 3278 მომხმარებელი და ამ 10 ბილეთის ყიდვას შეეცადა ერთდროულად 552 მომხმარებელი, ბილეთების რეალიზაცია მოხდა 8-9 წუთის მონაკვეთში. მომხმარებელთა მაღალი ნაკადის გამო, სისტემას შეექმნა ტექნიკური ხარვეზი და დროებით შეწყდა ბილეთების რეალიზაცია, ამჟამად მიმდინარეობს ტექნიკური სამუშაოები ხარვეზის აღმოსაფხვრელად, რის შემდეგაც განახლდება ეტაპობრივად ბილეთების რეალიზაციის პროცესი”, – ნათქვამია კომპანიის განცხადებაში.

საგარეო საქმეთა სამინისტროს ცნობით, საკოორდინაციო საბჭომ განსაზღვრა დამატებითი რეისები შემდეგი მიმართულებით:

✔️16 აპრილი – პარიზი-თბილისი

✔️18 აპრილი – თელავივი-თბილისი

✔️21 აპრილი – რომი-თბილისი

აღნიშნულ რეისებს განახორციელებს კომპანია „Georgian Airways”.

ავიარეისებზე ბილეთები გაიყიდება რეისის თარიღამდე 2 დღით ადრე, კომპანიის ვებ-გვერდზე, ბილეთის ფასი განსაზღვრულია 199 ევრო.

საქართველოში ჩამოსული ყველა მგზავრი გაივლის 14 დღიან სავალდებულო კარანტინს.

საგარეო უწყების ცნობით, საკოორდინაციო საბჭოს მიერ განსაზღვრული რეისებიდან ასევე განხორციელდება :

7 აპრილი – ათენი-თბილისი
10 აპრილი – ლარნაკა – თბილისი
12 აპრილი – ბერლინი-თბილისი
14 აპრილი – ამსტერდამი-თბილისი

“მსოფლიოში COVID-19 გავრცელების ფონზე, საქართველოს მთავრობის ხელშეწყობით სამშობლოში დაბრუნდა 5000-მდე საქართველოს მოქალაქე. მოქალაქეების ორგანიზებული დაბრუნება მოხდა შემდეგი ქვეყნებიდან: ჩინეთი, იტალია, ირანი, პოლონეთი,ბულგარეთი,გერმანია, საბერძნეთი, ბელარუსი, ნიდერლანდები, ეგვიპტე, აზერბაიჯანი, სომხეთი”, – აცხადებენ საგარეო უწყებაში.

მასალების გადაბეჭდვის წესი