ნეტგაზეთი | საქართველო უცხოელებისთვის ორი კვირით საზღვარს კეტავს საქართველო უცხოელებისთვის ორი კვირით საზღვარს კეტავს – Netgazeti
RU | GE  

საქართველო უცხოელებისთვის ორი კვირით საზღვარს კეტავს

საქართველოს მთავრობის გადაწყვეტილებით, 18 მარტის 00:00 საათიდან საქართველოში უცხო ქვეყნის მოქალაქეების შემოსვლა ორი კვირით იკრძალება. რუსეთთან დაკავშირებით ეს შეზღუდვა უკვე ძალაშია.

ეს გადაწყვეტილება რამდენიმე წუთის წინ გამოაცხადა პრემიერ-მინისტრის, გიორგი გახარიას სპიკერმა ირაკლი ჩიქოვანმა. გადაწყვეტილება მიიღო მთავრობასთან არსებულმა საკოორდინაციო საბჭომ.

ჩიქოვანის განცხადებით, საქართველოს მოქალაქეებს, ვისაც სამშობლოში დაბრუნების სურვილი აქვთ, ექნებათ საშუალება, საქართველოს ავიახაზების დახმარებით დაბრუნდნენ. იგივე შესაძლებლობა ექნებათ საქართველოს მოქალაქეების ოჯახის წევრებს [ამ საკითხზე დამატებით განმარტებას საგარეო საქმეთა მინისტრი გააკეთებს].

კორონავირუსის გავრცელების თავიდან ასარიდებლად მთავრობამ ასევე მიიღო შემდეგი გადაწყვეტილებები:

  1. დროებით იკეტება საქართველოს სამთო-სათხილამურო კურორტები;
  2. კაფეებს, რესტორნებსა და ბარებს ეძლევათ რეკომენდაცია, დროებით შეიზღუდოს მოქალაქეების უშუალო მომსახურება და იმოქმედოს მხოლოდ ე.წ. გატანის სერვისებმა;
  3. 70 წელს გადაცილებულ მოქალაქეებს ეძლევათ რეკომენდაცია, მაქსიმალურად მოერიდონ საზოგადოებრივი თავშეყრის ადგილებს და შეძლებისდაგვარად იმყოფებოდნენ იზოლაციაში, რათა თავიდან იყოს აცილებული პოტენციური საფრთხე მათი ჯანმრთელობისთვის;
  4. მთავრობის ადმინისტრაციაში იქმნება უწყებათაშორისი საკოორდინაციო საბჭოს სხდომაზე მიღებული გადაწყვეტილებების შესრულების მონიტორინგის მექანიზმი;

„ჩვენი რეკომენდაციაა, რომ მაქსიმალურად შეიზღუდოს თავშეყრის ადგილები და კონტაქტი ჩვენს თანამოქალაქეებთან“, – განაცხადა ირაკლი ჩიქოვანმა.


ქვეყანაში, 16 მარტის მდგომარეობით, კორონავირუსით ინფიცირების 33 შემთხვევაა დაფიქსირებული. კარანტინის რეჟიმში 637 იმყოფება, სტაციონარში მეთვალყურეობის ქვეშ კი 54 ადამიანია.

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია - „ნეტგაზეთის“ რეპორტიორი 2018 წლის სექტემბრიდან. მობ.: 995 555 223 568; ელ-ფოსტა: lukapertaia@gmail.com