საქართველოს მთავრობის ინფორმაციით, 14 მარტიდან ათი დღის განმავლობაში საქართველო-სომხეთსა და საქართველო-აზერბაიჯანს შორის მოქალაქეების მიმოსვლა დროებით შეწყდება. მათივე ცნობით, შეზღუდვა არ გავრცელდება სატვირთო გადაზიდვებსა და საქართველოს იმ მოქალაქეებზე, რომელთაც ქვეყანაში დაბრუნება ენდომებათ.
“საქართველოს პრემიერ-მინისტრი გიორგი გახარია ტელეფონით ესაუბრა სომეხ და აზერბაიჯანელ კოლეგებს. სომხეთის პრემიერ-მინისტრ ნიკოლ ფაშინიანსა და აზერბაიჯანის პრემიერ-მინისტრ ალი ასადოვთან საუბრის შედეგად, მიღებულია ერთობლივი გადაწყვეტილება, 2020 წლის 14 მარტიდან, 10 დღის განმავლობაში საქართველო-სომხეთსა და საქართველო-აზერბაიჯანს შორის მოქალაქეების გადაადგილების დროებით შეჩერების შესახებ.
ამასთან, მხარეები შეთანხმდნენ, რომ უზრუნველყოფენ სამშობლოში დაბრუნების სურვილის მქონე საკუთარი მოქალაქეების ქვეყანაში შეუფერხებელ შესვლას. შეზღუდვები არ ვრცელდება სატვირთო გადაზიდვებზე,” – წერია საქართველოს მთავრობის მიერ გავრცელებულ განცხადებაში.
13 მარტის მდგომარეობით, საქართველოში კორონავირუსის 25 შემთხვევაა რეგისტრირებული.
