ნეტგაზეთი | აჭარა ტვ აშშ-ის სახელმწიფო დეპარტამენტის ანგარიშში აჭარა ტვ აშშ-ის სახელმწიფო დეპარტამენტის ანგარიშში – Netgazeti

აჭარა ტვ აშშ-ის სახელმწიფო დეპარტამენტის ანგარიშში

აჭარის მაუწყებელში განვითარებული მოვლენები აშშ-ის სახელმწიფო დეპარტამენტის ახალ ანგარიშში მოხვდა. ანგარიში მიმოიხილავს 2019 წელს საქართველოში ადამიანის უფლებების შესახებ მდგომარეობას.

ანგარიშში წერია, რომ ზოგიერთი მედიასაშუალება, მედიის უფლებების დამცველი და არასამთავრობო ორგანიზაცია აგრძელებს შეშფოთების გამოხატვას მედიაში პოლიტიკური გავლენების შესახებ.

იქვე მოყვანილია აჭარის მაუწყებლის მრჩეველთა საბჭოს 19 აპრილის გადაწყვეტილება, დაეთხოვათ გენერალური დირექტორი ნათია კაპანაძე, რის საბაბადაც სახელმწიფო სახსრების არასწორად გამოყენება და პროგრამული პრიორიტეტების შეუსრულებლობა დაასახელა. „საერთაშორისო მონიტორები, მათ შორის ეუთოს ODIHR-ი, მანამდე აჭარის ტელევიზიას მიუკერძოებელ მედიად მიიჩნევდნენ“.

სახელმწიფო დეპარტამენტის ანგარიშში ნახსენებია არაერთი განცხადება სხვადასხვა არასამთავრო ორგანიზაციების გაერთიანების მხრიდან, რომლებიც კაპანაძის იმპიჩმენტს აკრიტიკებდნენ და აცხადებდნენ, რომ ამ ნაბიჯით ძლიერდებოდა ეჭვები შესაძლო პოლიტიკური ჩარევის შესახებ.

„2019 წლის დეკემბერში ჟურნალისტებმა პროტესტი გამოხატეს და ამბობდნენ, რომ ახალი დირექტორი მათს სამუშაო პროცესში ერეოდა და ცდილობდა არხის სარედაქციო პოლიტიკაზე გავლენის მოპოვებას. სახალხო დამცველმა ხაზი გაუსვა, რომ იმის გათვალისწინებით, რომ აჭარის ტელევიზია საზოგადოებრივი მაუწყებელია, მის გარშემო განვითარებული მოვლენები გავლენას ახდენს ქვეყნის მედიაგარემოზე“, – წერია ანგარიშში.


აჭარის ტელევიზიაში ცვლილებები მას შემდეგ დაიწყო, რაც დირექტორი ნათია კაპანაძე 2019 წლის გაზაფხულზე თამამდებობიდან გადააყენეს.

მაშინ ნათია კაპანაძემ აღნიშნული დაუკავშირა ხელისუფლების მიერ ტელევიზიის გაკონტროლების სურვილს. მას შემდეგ ტელევიზიის დირექტორის მოვალეობას დირექტორის მოადგილე ნათია ზოიძე ასრულებდა, რომელსაც ახალმა დირექტორმა გიორგი კოხრეიძემ ფუნქციები შეუკვეცა.

ზოიძემ ამის შემდეგ აჭარის მაუწყებელი საერთოდ დატოვა. აჭარის ტელევიზიის თანამშრომლები უკვე რამდენიმე თვეა საუბრობენ ხელისუფლებიდან მომდინარე საფრთხეზე.

ისინი აცხადებენ, რომ ტელევიზიაში მიმდინარე პროცესები მიზნად ისახავს საკვანძო თანამდებობებიდან იმ ადამიანების გაშვებას, რომლებიც ამ ტელეარხის დამოუკიდებელ და მიუკერძოებელ სარედაქციო პოლიტიკას განსაზღვრავენ.

ბოლო პერიოდში ტელევიზიაში არაერთი საკადრო ცვლილება განხორციელდა.

რა ხდება აჭარის ტელევიზიაში? – 12 კითხვა, 12 პასუხი


10 მარტს აჭარის მაუწყებლის გარშემო განვითრებულ მოვლენებს კიდევ ერთხელ გამოეხმაურა მედიის თავისუფლების საკითხებში ეუთოს სპეციალური წარმომადგენელი, ჰარლემ დეზირი და განაცხადა, რომ შეშფოთებულია აჭარის მაუწყებელში ბოლო დროს განვითარებული მოვლენებით.

შეშფოთებული ვარ – ეუთოს სპეც.წარმომადგენელი აჭარის მაუწყებლის მოვლენებზე

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია - „ნეტგაზეთის“ რეპორტიორი 2018 წლის სექტემბრიდან. მობ.: 995 555 223 568; ელ-ფოსტა: lukapertaia@gmail.com