ერთ-ერთი მოქალაქე, რომელიც გულშემატკივრების მიერ შედგენილ სიებში არ ჩაეწერა, ჯებირების პირველ რიგებში დადგა. მან თქვა, რომ ქომაგების მიერ თვითნებურად შექმნილი ჟურნალი არ აინტერესებს და დილით ამის გარეშე, ფედერაციის სტიუარდების მიერ გაკეთებულ ჯგუფებს გაჰყვებოდა სალაროებთან სუპერთასის მატჩზე დასასწრები ბილეთების შესაძენად.

სხვა გულშემატკივრებმა მას ინტრიგანი უწოდეს. მოქალაქეს რამდენიმე გულშემატკივარმა სიტყვიერი და ფიზიკური შეურაცხყოფა მიაყენა. მან ვაკის პარკის ტერიტორია მალევე დატოვა. ადგილზე სამართალდამცავებს ამ ინციდენტისთვის ყურადღება არ მიუქცევიათ.

4 ათასზე მეტი ფეხბურთის გულშემატკივარი იმყოფება თბილისში, ვაკის პარკში და მუდმივად იზრდება იმ ადამიანების რიცხვი, რომლებიც სუპერთასის ბილეთების შესაძენად მივიდნენ და იქ ღამის გათენებას აპირებენ. ადგილზე მობილიზებულია პოლიციაც. ბილეთების გაყიდვა 09:00 საათიდან დაიწყება.

11 აგვისტოს დინამო არენაზე, სუპერთასის მატჩში ერთმანეთს უეფას ჩემპიონთა ლიგის გამარჯვებული “ბარსელონა” და ევროპის ლიგის თასის მფლობელი “სევილია” დაუპირისპირდებიან.

თავდაპირველად, სუპერთასის ბილეთები biletebi.ge-ის უნდა გაეყიდა, თუმცა ხარვეზების გამო გულშემატკივრებმა ბილეთების ონლაინ შეძენა ვერ შეძლეს.