ნეტგაზეთი | თბილისის აეროპორტში “კორონავირუსზე” შემოწმება დაიწყო თბილისის აეროპორტში “კორონავირუსზე” შემოწმება დაიწყო – Netgazeti
RU | GE  

თბილისის აეროპორტში “კორონავირუსზე” შემოწმება დაიწყო

თბილისის საერთაშორისო აეროპორტში “კორონავირუსის” გავრცელების საწინააღმდეგოდ პრევენციული ღონისძიებები უკვე დაიწყო.

ჯანდაცვის სამინისტროს ინფორმაციით, ეპიდემოლოგების ჯგუფს საგანგებო სიტუაციების კოორდინაციისა და გადაუდებელი დახმარების ცენტრის ეკიპაჟებიც შუერთდნენ. ადგილზე მედიკოსები მგზავრებს როგორც დისტანციური თერმომეტრებით, ისე პირადი გასაუბრებით ამოწმებენ. მათ ასევე მიეწოდებათ ინფორმაცია ვირუსის სიმპტომურ მახასიათებლებთან დაკავშირებით.

შემოწმება კორონავირუსზე. თბილისის აეროპორტი. ფოტო: ჯანდაცვის სამინისტრო

“ვირუსის გავრცელების მხრივ, საქართველო დაბალი რისკის ქვეშ მყოფ ქვეყნებს შორისაა. ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო ინტენსიურ კომუნიკაციას ჯანდაცვის მსოფლიო ორგანიზაციასთან აწარმოებს და საქართველოში “კორონავირუსის” გავრცელების პრევენციისთვის საერთაშორისოდ დადგენილ ღონისძიებებს შესაბამის სამსახურებთან ერთად ახორციელებს”, – ნათქვამია უწყების განცხადებაში.


ახლადაღმოჩენილი კორონავირუსით გარდაცვლილთა რაოდენობა ჩინეთში 41-მდე გაიზარდა. ვირუსის შემთხვევები დაფიქსირდა ევროპაში (კერძოდ, საფრანგეთში) და ავსტრალიაშიც.

რა უნდა ვიცოდეთ ჩინეთში გავრცელებული ახალი ვირუსის შესახებ

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ჩიჩუა არის "ნეტგაზეთის" რეპორტიორი 2018 წლის სექტემბრიდან.