დაავადებათა კონტროლის ეროვნული ცენტრის გენერალური დირექტორის, ამირან გამყრელიძის თქმით, ამ ეტაპზე საქართველო უსაფრთხო ზონაში იმყოფება ჩინეთში, ვუჰანში აღმოჩენილი ვირუსის გავრცელების თვალსაზრისით, თუმცა გავრცელების რისკები მაინც არსებობს. ამის შესახებ მან სპეციალურად გამართულ პრესკონფერენციაზე ისაუბრა.
“ჩვენ გვაქვს შიდა კონსულტაციები და ჩამოყალიბებული გავქვს შიდა სამუშაო გეგმა, თუ რა უნდა განხორციელდეს, რა უნდა გააკეთოს დაავადებათა კონტროლის ცენტრმა და რა უნდა გაკეთდეს მთლიანად ქვეყანაში… იმის გამო, რომ შორს ვართ და ამ პროვინციიდან საქართველოში პირდაპირი ავიარესისები არ სრულდება, რისკი მინიმალურია, თუმცა გავრცელების თეორიული შანსი, რა თქმა უნდა, არის”, – განმარტავს დაავადებათა კონტროლის ეროვნული ცენტრის გენერალური დირექტორი.
გამყრელიძის თქმით, ჩინეთის ქალაქ ვუჰანიდან გავრცელებული ვირუსის მსგავსი კორონავირუსი 2002 წელსაც გავრცლედა და მაშინ წელიწადნახევარი დასჭირდა მის შეჩერებას. თუმცა, გამყრელიძის განმარტებით, თანამედროვე ტექნოლოგიების გამოყენებით ვირუსის სწრაფად შეჩერების შანსები დღეს უფრო მაღალია.
მისი თქმით, ვირუსს, რომელიც კორონავირუსის სახეობის 2019-nCoV-ის სახელით არის ცნობილი, ამ ეტაპზე სპეციფიკური მკურნალობა არ სჭირდება:
“მკურნალობა არის სიმტომური ხასიათის, დაავადების სიმძიმის მიხედვით. შესაბამისად, ჩვენი ექიმები [ინფექციონისტები] კარგად არიან გათვიცნობიერებული”, – აღნიშნა გამყრელიძემ.
დაავადებათა კონტროლის ეროვნულმა ცენტრმა ასევე გამოაქვეყნა რეკომენდაციები იმ ადამინებისთვის, ვისაც ვუჰანში უწევს მოგზაურობა:
- მოერიდეთ ავადმყოფ ადამიანებთან კონტაქტს;
მოერიდეთ ცხოველებთან კონტაქტს (მკვდარი, ცოცხალი); ცხოველთა ბაზრებსა და ფერმებს; ცხოველურ პროდუქტებს (თერმულად არასაკმარისად დამუშავებული ხორცი); - ხშირად დაიბანეთ ხელები საპნითა და წყლით მინიმუმ 20 წამის განმავლობაში, ხოლო მათზე ხელმისაწვდომობის არქონის შემთხვევაში გამოიყენეთ ალკოჰოლის შემცველი სადენზიფექციო საშუალება;
- ხანში შესულმა და ჯანმრთელბის პრობლემების მქონე მოგზაურებმა, რომლებიც ვუჰანში მიემგზავრებიან, შესაძლებელია უფრო მეტი რისკი შეუქმნან საკუთარ ჯანმრთელობას, გამგზავრება უნდა შეათანხმონ თავიანთ სამედიცინო დახმარების მიმწოდებელთან.
თუ უკვე იმოგზაურეთ ვუჰანში და გაქვთ მაღალი ტემპერატურა, ხველა ან სუნთქვის გაძნელება:
- დაუყოვნებლივ მიმართეთ სამედიცინო მომსახურების მიმწოდებელს;
- აცნობეთ ექიმს თქვენი მოგზაურობისა და სიმპტომების შესახებ;
- მოერიდეთ სხვა ადამიანებთან კონტაქტს;
- არ იმოგზაუროთ ავადმყოფობის პერიოდში;
- დაიფარეთ პირისა და ცხვირის მიდამო ცხვირსახოცით ან ტანსაცმლის სახელოს გამოყენებით ( და არა ხელით) ცემინების და ხველის დროს;
- ხშირად დაიბანეთ ხელები საპნითა და წყლით მინიმუმ 20 წამის განმავლობაში, ხოლო; მათი არქონის შემთხვევაში გამოიყენეთ ალკოჰოლის შემცველი სადენზიფექციო საშუალება;
- სამედიცინო დაწესებულებებში საჭიროა გაძლიერდეს ინფექციის კონტროლის სტანდარტული ღონისძიებები, განსაკუთრებით საავადმყოფოებსა და გადაუდებელი დახმარების განყოფილებებში.
NCDC ასევე ჯანდაცვის მსოფლიო ორგანიზაციაზე დაყრდნობით ავრცელებს ინფორმაციას, რომ ამ დროის მონაცემებით მსოფლიოში სულ დაფიქსირებულია 300-მდე შემთხვევა, აქედან 6 დასრულდა ლეტალურად. ჩინეთიდან ვირუსის გავრცლება სხვა ქვეყნებში კი დადასტურებულია ტაილანდში -2, იაპონიაში – 1, კორეის რესპუბლიკაში – 1, აშშ-ში – 1. ჩინეთში ჰოსპიტალიზებული შემთხვევებიდან კი 51 შეფასებულია როგორც მძიმე, 12 კი, როგორც კრიტიკული.
