ახალი ამბები

კაკულიას თქმით, ხელისუფლებამ ანაკლიის პორტს ხელი რუსული საფრთხის გათვალისწინებით შეუშალა

9 იანვარი, 2020 • 6293
კაკულიას თქმით, ხელისუფლებამ ანაკლიის პორტს ხელი რუსული საფრთხის გათვალისწინებით შეუშალა

“ქართული ოცნების” წევრი, პარლამენტის დარგობრივი ეკონომიკის პოლიტიკის თავმჯდომარე რომან კაკულია აცხადებს, რომ საქართველოს ხელისუფლებამ ანაკლიის ღრმაწყლოვანი პორტის მშენებლობა რუსეთიდან მომდინარე საფრთხეების გათვალისწინების გამო შეაფერხა.

რომან კაკულიამ “ანაკლიის განვითარების კონსორციუმისთვის” მთავრობის მიერ ხელშეკრულების გაუქმება ტვ “პირველის”ეთერში სტუმრობისას შეაფასა. როგორც კაკულია ამბობს, მისი ნათქვამი ეფუძნება საჯაროდ გაკეთებული განცხადებების ანალიზს და უშუალოდ გადაწყვეტილების მიღების პროცესში არ ყოფილა ჩართული.

სანამ ანაკლიის პორტზე დაიწყებდა საუბარს, კაკულიამ შესავალი გააკეთა ბიძინა ივანიშვილის საგარეო ორიენტაციაზე.

“მე ვერ ვხედავ, რომ ბიძინა ივანიშვილმა 2012 წლიდან თავის დამოკიდებულებაში რამე შეიცვალა. ის როგორი ფრთხილიც იყო რუსეთთან ურთიერთობაში, ისეთი არის ახლაც. ეს სიფრთხილე იყო იმ ადამიანების მოთხოვნაც, ვინც ის აირჩია. ყველას ჰგონია, რომ წინა ხელისუფლების ერთ-ერთ ცოდვაზე, ძალადობაზეა საუბარი. მეორე მთავარი მოთხოვნა იყო 2008 წლის არგამეორება”, – თქვა რომან კაკულიამ.

“ქართული ოცნების” დეპუტატის განმარტებით, მამუკა ხაზარაძემ, რომელიც “ანაკლიის განვითარების კონსორციუმის” დამფუძნებელია, პორტის მშენებლობისას ვერ გათვალა საგარეო საფრთხეები.

“მამუკა ხაზარაძე რას გვეუბნება, რომ ეს საფთხეები არ არსებობს? თუ გვეუბნება, რომ ბიძინა ივანიშვილი ვერ მოაგვარებს ამ საფრთხეებს და ის არის ის პიროვნება, რომელიც თავად მოაგვარებს ამ საფრთხეებს? რუსული საფრთხეების იგნორირება “ნაციონალური მოძრაობის” შემთხვევაში გასაგებია…”, – აღნიშნა კაკულიამ ტვ “პირველის” ეთერში.

რომან კაკულიამ ასევე თქვა, რომ მისთვის გასაგებია ის მოტივი, რის გამოც პრობლემები შეექმნა ანაკლიის პორტს, თუმცა არ მოსწონს ინსტრუმენტები, რომლითაც ეს გაკეთდა.

“თუ საგარეო პოლიტიკაში არათანხვედრასთან გვაქვს საქმე, გასაღები სწორედ ამაშია, თორემ იმ ინსტრუმენტებთან, რომლითაც მთავრობა ამაზე რეაგირებს, კითხვები მეც მაქვს. არც მე მომწონს ის თემა, ფულის გათეთრება იყო თუ არ იყო, შეკითხვები მაქვს, რა თქმა უნდა”, – აღნიშნა კაკულიამ.

ჟურნალისტმა დიანა ტრაპაიძემ კაკულიასთან დააზუსტა კითხვა, ნამდვილად რუსულმა საფრთხემ გამოიწვია თუ არა პროექტის შეჩერება, და თუ ეს ასე იყო, რატომ დაიკარგა 5 წელი, ანუ ის დრო, რაც ამ პროექტის მომზადებას დასჭირდა.

“5 წელი არა, მაგრამ ბოლო ერთი წელი რატომ დაიკარგა, მაქვს კითხვა. ეს რომ ასე დასრულდებოდა, ისედაც გასაგები იყო. კიდევ ერთი შანსის მიცემამ დადებითი ქულა ჩვენ არ მოგვიტანა და ერთი წელი დაიკარგა. თუ საგარეო პოლიტიკაშია საქმე, მე ვალდებული ვარ, ნაკლებად მომთხოვნი ვიყო ინსტრუმენტების მიმართ, თორემ ინსტრუმენტები მეც არ მომწონს. მთავარი საკითხი არის სწორი ორიენტირი საგარეო პოლიტიკაში. რუსეთის საფრთხეების არშეფასება როგორ დაუჯდება ქვეყანას, ვინც ამაზე არ ფიქრობს, არ არის სწორი პოლიტიკოსი.

ჩემი მოსაზრებაა, რომ ეს საფრთხეები არსებობს და ვინც გადაწყვეტილებას იღებდა, ეს საფრთხეები უნდა გაეთვალისწინებინა. თუ ეს საფრთხე არსებობდა, პირველ რიგში, მამუკა ხაზარაძეს უნდა გაეთვალისწინებინა ეს და ამ ტიპის საუბრები უნდა ჰქონოდა მასთან, ვინც გადაწყვეტილებებს იღებს. თუ საგარეო პოლიტიკაშია მთავარი თემა, ყველამ უნდა აიღოს პასუხისმგებლობა, რა შედეგი დადგება ამის გაუთვალისწინებლობით”, – მიიჩნევს “ქართული ოცნების” დეპუტატი.

რომან კაკულიამ ასევე ისაუბრა იმის შესახებ, ხელისუფლებამ ღიად რატომ არ ისაუბრა ამ საფრთხეებზე და რატომ გამოიგონა სხვადასხვა ბარიერები ანაკლიის პროექტის შესაჩერებლად”

“არსებობს სატელევიზიო და რეალური პოლიტიკა. ექსპერტების ნაწილი საზღვარგარეთ იმიტომ არიან განვითარებული, რომ რასაც პოლიტიკოსები ვერ ამბობენ, ისინი ამბობენ. სამწუხაროდ, ჩვენთან აფილირებული ექსოპერტები ამ ანალიზს ვერ ამბობენ და ამის ჩემზე აღება მიხდება გუნდში ყოფნის რისკის ფასად. ამ მოტივაციებზე საუბარი სატელევიზო პოლიტიკაში პირდაპირ არ მოსულა.

მე არ ველაპარაკები მხოლოდ ოპონენტებს. ველაპარაკები მოსახლეობასაც. რატომ დაეტაკა ხელისუფლება მამუკა ხაზარაძეს? მეც მიკვირს ეს. ჩემი აზრით, იმიტომ დაეტაკა, რომ თუ მან საგარეო პოლიტიკასთან დაკავშირებით ვერ გააკეთა სწორი ორიენტირი, ან მისი ხედვა თუ არ დამეთხვა, ეს მისი პრობლემაა, რა თქმა უნდა… მე გეუბნებით პირდაპირ, რომ ამ ნარატივში – ბიძინა ივანიშვილი არის თუ არა რუსული პროექტი, თუ მისი დამოკიდებულება რუსეთის მიმართ არის ქვეყნის უსაფრთხოებიდან გამომდინარე – მე ვდგავარ იმ ადამიანების მხარეს, ვინც ფიქრობენ, რომ ეს არის რუსეთის საფრთხის თავიდან აცილების პოლიტიკა”, – განუცხდა ტვ “პირველს” დეპუტატმა.

მან ასევე აღნიშნა, რომ თავდაპირველად, ანაკლიის პორტის მშენებლობაში ამერიკული ინტერესი გამოკვეთილი არ ყოფილა.

“თუ ეს იყო ამერიკული ინტერესი, ამის გამოხატვა მოხდა მოგვიანებით. თავიდან მხოლოდ ეკონომიკურად სანამ იყო ამ პროექტის განხილვა, მანამდე რატომ უნდა ჰქონოდა ვინმეს წინააღმდეგობა?”, – თქვა კაკულიამ. მან კიდევ ერთხელ აღნიშნა, რომ არ აქვს კითხვები პროექტის შეფერხების მოტივაციასთან.

გადაცემის დასრულდებამდე დიანა ტრაპაიძემ დეპუტატს შემაჯამებელი კითხვა შემდეგი ფორმით დაუსვა, რათა გამოერიცხა ინტერპრეტაციები:

“ამ პროექტის განხორციელებაში ივანიშვილმა დაინახა საფრთხე რუსეთთან ურთიერთობაში, რომ რაღაც ტიპის პრობლემებს შექმნიდა, ამიტომ მეორე ხელით დაიწყო მთავარი მოთამაშეების დისკრედიტაცია, პროექტისთვის ხელოვნური ბარიერების შექმნა და ურჩევნია ამას დაერქვას, პოლიტიკურად იეჭვიანა, ხაზარაძეს დევნის და ა.შ. ვიდრე თქვას, რომ ეს არის საფრთხეების გათვალისწინებით მიღებული გადაწყვეტილება? სწორად გავიგე?”, – ჰკითხა წამყვანმა მმართველი გუნდის დეპუტატს.

რომან კაკულია აღნიშნულს დაეთანხმა და, ფაქტობრივად, აღიარა, რომ ხელისუფლებამ მამუკა ხაზარაძისა და “ანკლიის განვითარების კონსორციუმის” წინააღმდეგ გარკვეული ქმედებები განახორციელა.

“კი ბატონო, რა თქმა უნდა, ჩემი დასკვნები ეფუძნება ბ-ნ მამუკა ხაზარაძის მიერ გაკეთებულ განცხადებებს, ჩემს ცოდნას და ემოციებს მიმდინარე პროცესებთან მიმართებაში… ჩემთვის წამყავნი არის ქვეყნის უსაფრთხოების ხედვა და ამ ინსტრუმენტების გამოყენება ხდება სხვა ინსტრუმენტების არარსებობის გამო და არა იმიტომ, რომ ამ ინსტრუმენტებით აღფრთოვანებულია ქვეყნის ინსტიტუტები”, – თქვა კაკულიამ.


რა მოხდა?

საქართველოს მთავრობამ 9 იანვარს თქვა, რომ ვალდებულებების შეუსრულებლობის გამო “ანაკლიის განვითარების კონსორციუმს”, რომელსაც ანაკლიის პორტი უნდა აეშენებინა, ხელშეკრულებას უწყვეტს.

“ანაკლიის განვითარების კონსორციუმი” მამუკა ხაზარაძემ დააფუძნა და მასში შედიოდნენ Conti Internmational (აშშ) და TBC  Hodling (საქართველო). ანაკლიის ღრმაწყლოვანი პორტის მშენებლობის პირველი ფაზა 2017 წელს, გიორგი კვირიკაშვილის პრემიერობისას დაიწყო. 2018 წელს კვირიკაშვილი თანამდებობიდან გადადგა, მალევე კი პროკურატურამ “ფულის გათეთრების საქმეზე” გამოძიება დაიწყო 2008 წელს განხორციელებული საბანკო ტრანზაქციის გამო, დაახლოებთ ერთ წელიწადში კი “თიბისი ბანკის” დამფუძნებლებს, მამუკა ხაზარაძესა და ბადრი ჯაფარიძე, ბრალი წაუყენა. ამ ბრალდებას ხაზარაძე-ჯაფარიძე პოლიტიკურად მოტივირებულად მიიჩნევენ. ისინი დარწმუნებულნი არიან, რომ ხელისუფლებამ ეს ნაბიჯი ანაკლიის პორტის მშენებლობის შესაფერხებლად გადადგა.

ბრალის წარდგენიდან მალევე ხაზარაძე-ჯაფარიძემ აღნიშნული ქმედება პორტის მშენებლობის ხელშეშლას დაუკავშირეს და კონსორციუმი დატოვეს. აშშ-ის სახელმწიფო მდივანმა მაიკ პომპეომ პრემიერ მამუკა ბახტაძესთან შეხვედრის შემდეგ, 2019 წლის ივნისში, ანაკლიის პორტის მშენებლობის მნიშვნელობას გაუსვა ხაზი. ხელისუფლებამ “ანაკლიის განვითარების კონსორციუმს” ვალდებულებების შესრულების დრო რამდენჯერმე გადაუვადა.

 

მასალების გადაბეჭდვის წესი