საქართველოს პრემიერ-მინისტრმა გიორგი გახარიამ დღეს, 9 იანვარს გამართულ მთავრობის სხდომაზე ბაკურიანსა და გუდაურში შექმნილ წყალმომარაგების პრობლემებზე ისაუბრა. გახარიას განმარტებით, მთავრობას აღნიშნული პრობლემა უნდა მოეგვარებინა:
“მოგეხსენებათ, რომ იყო გარკვეული პრობლემები წყალმომარაგების თვალსაზრისით, როგორც გუდაურში, ასევე ბაკურიანში, და აქ ერთმნიშვნელოვნად, პირდაპირ უნდა ვთქვათ, რომ ჩვენ ეს პრობლემა უნდა მოგვეგვარებინა, ეს არ უნდა მომხდარიყო”, – განმარტა გახარიამ.
მისი თქმით, ამ დროისთვის მთავრობამ ზუსტად იცის წყალმომარაგების პრობლემების გამომწვევი მიზეზები და ამ საკითხის აღმოფხვრაზე მუშაობს:
“გვესმის, რომ პრობლემა არის საკმაოდ სისტემური, გვესმის, რომ შესაბამისი დასკვნებია გასაკეთებელი, რომლებიც უკვე გაკეთდა, და ჩვენ ერთი წელი უნდა დავუთმოთ სრულად იმას, რომ მომავალ წელს მსგავსი შემთხვევები აღარ განმეორდეს”, – განაცხადა გახარიამ.
გახარიას განმარტებით, ამ დროისთვის პრობლემა ბოლომდე მოგვარებული არ არის, თუმცა ის იმედოვნებს, რომ წყალმომარაგება უახლოესი საათების განმავლობაში აღდგება.
