“ჩვენმა ახალგაზრდობამ გამოიჩინა საოცარი თავდადება. მთელი ახალგაზრდობა გამოვიდა დასახმარებლად. მე გუშინ გახლდით იმ ადგილებში და ვხედავდი, როგორ შრომობდნენ თავდადებით. მწუხარება, იმედია, სიხარულით შეიცვლება და ჩვენი ხალხი ყველაფერს გააკეთებს, ჩვენი ხელისუფლება, ჩვენი ეკლესია, ყველაფერს გავაკეთებთ იმისათვის, რომ მსგავსი აღარ განმეორდეს. უნდა იყოს გათვალისწინებული ის, რაც განვიცადეთ და აქედან უნდა გავაკეთოთ დასკვნები,”- განაცხადა ილია მეორემ.

 

13 ივნისს დაწყებულმა წვიმამ მდინარეების, ვერესა და მტკვრის ადიდება გამოწვია. წყნეთი-ბეთანიის გზატკეცილზე ჩამოწოლილმა მეწყერმა რამდენიმე სოფელი გარესამყაროს მოწყვიტა. სტიქიის შედეგად დაიღუპა სულ მცირე 12 ადამიანი და იძებნება 24. 36-მა დაშავებულმა მიმართა საავადმყოფოებს. მთავრობის ცნობით, ზარალი მიახლოებით 40 მილიონი ლარია.

 

დაიტბორა თბილისის ზოპარკი, მისი ბინადრების ნაწილი დაიხრჩო, ნაწილი კი თბილისის ქუჩებში გაიქცა. გაქცეულთა ნაწილი ცეცხლსასროლი იარაღით მოკლეს ნაწილი კი დააძინეს.

 

დავით ნარმანიას განცხადებით, სამაშველო სამსახურები თბილისში ეძებენ თბილისის ზოოპარკის ცხოველებს. მერია მოუწოდებს თბილისის მოსახლეობას, რომ თავი შეიკავონ თბილისში გადაადგილებისგან.