“ვცდილობთ გავარკვიოთ, თუ არის დაზარალებული, თუ არის წყლის, საკვების, კარვის, ან საწოლი საშუალებების საჭიროება. შემდეგ უკვე გადავცემთ მათ ჩვენს ჰუმანიტარულ ტვირთს და ვათავსებთ სპეციალურ კარვებში”- ამბობს წითელი ჯვრის მოხალისე, თამინა შანიძე.

 

კარვები ამჟამად გაშლილია ვაკე-საბურთალოს გამგეობასთან. შანიძს ინფორმაციით, ამ ეტაპზე მობილიზებულია წითელი ჯვრის 42 მოხალისე, რომელთაც სპეციალური ტრენინგი აქვთ გავლილი მსგავსი სიტუაციებისთვის.

 

 

სტიქიით დაზარალებული ადამიანების დასახმარებლად და ქალაქის დასასუფთავებლად მოხალისეები ინტერნეტით გაერთიანდნენ. Facebook-ზე შეიქმნა ჯგუფი “#13ივნისი – მოხალისეთა გაერთიანება”, სადაც უკვე 4000-მდე ადამიანია დამატებული. ჯგუფის შექმნის ინიციატორები მოხალისებს ინსტრუქციებსა და დავალებებს სწორედ ინტერნეტის მეშვეობით აწვდიან. პარტიზანული მებაღეობის წარმომადგენელმა, ნიკა დავითაშვილმა დილით შექმნა ონლაინ-დოკუმენტი, სადაც უკვე 1700-ზე მეტმა ადამიანმა გაიარა რეგისტრაცია მოხალისეობის შესახებ.

 

 

 

დავითაშვილის თქმით, მოხალისეები მერიის ინსტრუქციებს ელოდებიან, თუ სად სჭირდება სამაშველო სამსახურს დახმარება, რათა ქაოტურად არ მოიქცნენ და მათ ხელი არ შეუშალონ. მისი ინფორმაციით, მოხალისეებს მერიასთან აქვთ სატელეფონო კავშირი. პარტიზანი მებაღის თქმით, ვაკე-საბურთალოს რაიონის გამგეობის შენობაში ხდება ჰუმანიტარული დახმარების შეგროვება.

 

 

13 ივნისის ღამეს თბილისში მოსულმა ძლიერმა წვიმამ დედაქალაქში მძიმე ვითარება შექმნა. სტიქიის ეპიცენტრი მდინარე ვერეს ხეობა და ზოოპარკის ტერიტორიაა. არის მსხვერპლი. ამ დროისთვის არსებული ინფორმაციით დაღუპულია რვა ადამიანი. დაშავებულთა და დაღუპულთა რაოდენობა ზუსტდება. ადიდებულმა მდინარე ვერემ გაანადგურა თამაზ ელიზბარაშვილის ძაღლების თავშესაფარი და დატბორა ზოოპარკის ტერიტორია, რის შედეგადაც ვოლიერებიდან გაიქცნენ მტაცებელი ცხოველები, რომელთაგან შსს-ს ცნობით, რამდენიმე ლიკვიდირებულია. დანარჩენებს ისევ ეძებენ.