საპარლამენტო უმრავლესობის ერთ-ერთი ლიდერი მამუკა მდინარაძე სპეკულაციურს უწოდებს განცხადებებს, რომლის თანახმადაც, შესაძლოა, საზღვარგარეთ ბიძინა ივანიშვილის ანგარიშები დაყადაღდეს.
ჟურნალისტებმა ეს კითხვა მდინარაძეს მას შემდეგ დაუსვეს, რაც The Wall Street Journal-ის სარედაქციო საბჭომ საქართელოზე სტატია გამოაქვეყნა, რომელშიც საუბარია ივანიშვილისთვის სანქციების დაწესების შესახებ.
“გარწმუნებთ, რომ ნებისმიერი მსგავსი საუბარი სპეკულაციაა და სიმართლესთან შეხება არ აქვს”,-ამბობს მდინარაძე.
სტატიაში აღნიშნულია, რომ ამერიკის შეერთებულ შტატებს მეტის გაკეთება შეუძლია. სარედაქციო ჯგუფის ავტორობით დაწერილ სტატიაში განხილულია ბიძინა ივანიშვილის ქონებაც, რომელიც 90-იან წლებში რუსეთში დააგროვა და რომელსაც დიდი რაოდენობით ფასიანი ქაღალდები აქვს დასავლეთშიც:
“მის [ივანიშვილის] ქონებაზე სანქციების დაწესების საფრთხე, ასევე, მოგზაურობის შეზღუდვა მისთვის და მისი ახლობლებისთვის, უფრო მეტად გამოაფხიზლებს, ვიდრე საჯარო განცხადებები”, – ვკითხულობთ WSJ-ოს სარედაქციო სტატიაში.
