ნეტგაზეთი | ბრალი წამიყენეს – დავით ქაცარავა 20 აგვისტოს ინციდენტზე ბრალი წამიყენეს – დავით ქაცარავა 20 აგვისტოს ინციდენტზე – Netgazeti

ბრალი წამიყენეს – დავით ქაცარავა 20 აგვისტოს ინციდენტზე

ანტისაოკუპაციო მოძრაობა „ძალა ერთობაშიას“ ლიდერი, დავით ქაცარავა აცხადებს, რომ 20 აგვისტოს ინციდენტზე მას ბრალი წაუყენეს ძალადობის მუხლით.

20 აგვისტოს ინციდენტზე ქაცარავა ამბობდა, რომ თავს დაესხნენ. ქაცარავს და რამდენიმე ადგილობრივ მცხოვრებს შორის დაპირისპირების შემდეგ გამოძიება დაიწყო ძალადობის, სისხლის სამართლის კოდექსის 126-ე მუხლით.

ქაცარავამ დღეს, 18 დეკემბერს დაწერა, რომ ბრალიც ამავე მუხლით წაუყენეს, თუმცა ბრალს არ აღიარებს და აცხადებს: „2019 წლის 20 აგვისტოს განხორციელდა თავდასხმა, მე კი თავს ვიცავდი… სოფელ ბობნევში ხელისუფლების მოგზავნილი ტიტუშკების თავდასხმა მოეწყო ჩემზე“.

ქაცარავას თქმით, წინა დღით პოლიციიდან დაურეკეს და გორში დაიბარეს, როგორც თვითონ წერს, „საგამოძიებო მოქმედებებისთვის, იგივე ამოცნობაზე“.

„რა თქმა უნდა, დღეს ჩავედი ამ პროცედურაზე. საგამოძიებო მოქმედების დასრულების შემდეგ, როდესაც ვაპირებდი წამოსვლას, ჩემთვის მოულოდნელად მაცნობეს, რომ უნდა წარმიდგინონ ბრალი“.

მუხლი, რომლითაც ქაცარავას ბრალი წარუდგინეს, — ცემა/ძალადობა — ითვალისწინებს ჯარიმას, საზოგადოებისათვის სასარგებლო შრომას, შინაპატიმრობას ექვსი თვიდან ერთ წლამდე ან თავისუფლების აღკვეთას ერთ წლამდე.

ქაცარავას თქმით, საოკუპაციო ხაზთან რამდენიმე პირი თავს დაესხა

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია - „ნეტგაზეთის“ რეპორტიორი 2018 წლის სექტემბრიდან. მობ.: 995 555 223 568; ელ-ფოსტა: lukapertaia@gmail.com